Primeminister.kz saıtynyń redaksıasy elimizdiń 2024 jylǵy damý qorytyndylary týraly jarıalanymdar serıasyn jalǵastyrady.
Memleket basshysy Qasym-Jomart Toqaevtyń bastamasymen bıylǵy sáýir aıynan bastap respýblıkalyq «Taza Qazaqstan» ekologıalyq aksıasy bastaý aldy. İs-shara elimizdegi ekologıalyq ahýaldy jaqsartýǵa, halyqtyń ekologıalyq mádenıeti deńgeıin arttyrýǵa jáne azamattardy qorshaǵan ortany qorǵaý máselelerine tartýǵa baǵyttalǵan. Aksıa elimizdiń barlyq óńirin qamtyp, turaqty ekologıalyq bolashaq negizin qalady.
Osy jyldyń naýryz-qarasha aılary aralyǵynda uıymdastyrylǵan aksıa 5,83 mln-nan astam adamnyń basyn biriktirdi, bul – el halqynyń edáýir bóligin quraıdy. İs-sharalar aıasynda jappaı senbilikter ótkizildi, olardyń barysynda 1,1 mln tonnadan astam qoqys jınalyp, 1,6 mln-nan astam aǵash otyrǵyzyldy. Memlekettik qurylymdar deńgeıinde de, eriktiler men jeke uıymdardy qosa alǵanda, jurtshylyq arasynda da belsendi túrde jumys júrgizildi.
Ruqsat etilmegen qoqys úıindilerimen jáne aýanyń lastanýymen kúres
«Taza Qazaqstan» aksıasy aıasynda zańsyz qoqys úıindilerin anyqtaý boıynsha reıdter júrgizildi. Aýmaqtyq ekologıa departamentterimen jáne jergilikti bılik organdarymen birlesip kóptegen qoqys orny joıyldy.
«Taza aýa» reıdteri barysynda 482 avtokólik tekserilip, ekologıalyq standarttardy buzýdyń 105 faktisi anyqtaldy. 96 júrgizýshige aıyppul men eskertý túrindegi ákimshilik sıpattaǵy sharalar qoldanyldy. Bul sharalar ekologıalyq normalardy saqtaýdyń mańyzdy ekenin kórsetedi, jol qozǵalysyna qatysýshylardyń jaýapkershiligin arttyrdy.
Ekologıany sıfrlyq qoldaý
Jobanyń erekshe jetistigi – azamattarǵa ekologıa salasyndaǵy problemalar týraly habarlaýǵa jáne olardy sheshýge qatysýǵa múmkindik beretin @TazaQazBot sıfrlyq platformasynyń qurylýy boldy.
Osylaısha, bir jyl ishinde chat-bot arqyly 7 929 ótinim kelip tústi. Olardyń ishinde 7 061 ótinim oryndaldy, 168-i oryndalý satysynda, 23-i óńdelýde jáne 674 ótinim joıyldy.
Olardyń arasynda eń jıi kelip túsken ótinimder: aýmaqtardy tazalaý – 2 142 ótinim, turmystyq qoqysty shyǵarý – 668 ótinim, kóshelerdi abattandyrý – 648 ótinim, joldardy jóndeý boıynsha – 595 ótinim.
Óńirler arasynda Almaty kósh bastap tur – 2 014 ótinim. Odan keıingi orynda Astana tur – 1 587 ótinim. Úshinshi orynda Qaraǵandy oblysy – 757 ótinim.
Chat-bot ekologıalyq máselelerdi jedel sheshýge yqpal ete otyryp, azamattar men memleket arasyndaǵy dıalogtyń tıimdi quralyna aınaldy.
Halyqtyń ekologıalyq mádenıetin damytý tujyrymdamasy
Qol jetkizilgen nátıjelerdi nyǵaıtý jáne ekologıalyq sanany uzaqmerzimdi perspektıvada qalyptastyrý maqsatynda «Halyqtyń ekologıalyq mádenıetin damytýdyń 2024-2029 jyldarǵa arnalǵan tujyrymdamasy» bekitildi. Bul qujat ekologıalyq saıasattyń negizgi baǵyttaryn aıqyndaıdy.
Tujyrymdamanyń basymdyqtarynyń biri – jastardy ekologıalyq jobalarǵa tartý boldy. Jyl boıy leksıalar, eko-saǵattar jáne ekologıalyq zerthanalarǵa ekskýrsıalar uıymdastyryldy. Osylaısha, bıyl 90 myńnan astam erikti azamat abattandyrý jáne kógaldandyrý aksıalaryna qatysty.
Halyqtyń ekologıalyq saýatyn arttyrý maqsatynda qaldyqtardy qaıta óńdeý, lastaný deńgeıine monıtorıń júrgizý taqyryptaryn jarıa etý, abattandyrý jáne ekovolonterlikti damytý jóninde konkýrstar ótkizý jumystary júrgizilip jatyr.
Sondaı-aq Tujyrymdamanyń negizgi baǵyty – azamattardyń belsendi qatysýyna jaǵdaı jasaý. Óz tıimdiligin dáleldegen @TazaQazBot sekildi sıfrly platformalardy damytýǵa erekshe kóńil bólingen. Odan bólek, ekologıalyq normalardyń saqtalýyna jáne ekologıalyq standarttardyń engizilýine baqylaý kúsheıtilýde.
Sonymen qatar kelesi jyly turaqty ekologıalyq basqarý júıesin qurý úshin turaqtandyrý qorlarynyń jumysyn kúsheıtý kózdelgen. Aýmaqtardy kógaldandyrý jáne abattandyrý boıynsha aýqymdy respýblıkalyq aksıalar ótkizý josparlanǵan.
Buǵan qosa, shyǵaryndylar kólemin azaıtý jáne ekologıalyq standarttardy baqylaý úshin vedomstvoaralyq ózara is-qımyl kúsheıtiledi. Sıfrly tehnologıalar men medıa resýrstardy qosa alǵanda, halyqqa ekologıalyq bilim berý baǵdarlamalaryn damytý kózdelgen.
«Taza Qazaqstan» bastamasy aýmaqtardy tazalaýdan áldeqaıda aýqymdy mindetterdi qamtıdy. Bul – azamattardyń, bıznestiń, memlekettik qurylymdar men qoǵamdyq uıymdardyń kúsh-jigerin biriktiretin, ekologıalyq turǵydan sanaly ómir saltyn nasıhattaıtyn qozǵalys.
Keshendi sharalar men ınovasıalyq tehnologıalardy engizýdiń arqasynda Qazaqstan ekologıalyq saýlyqqa, ornyqty damýǵa jáne bolashaq urpaq úshin qolaıly orta qurýǵa mańyzdy qadamdar jasap otyr.