Aınalym qarajatyn qarjylandyrý jáne bólý sqemasy qaıta qaralmaq
Áleýmettik mańyzy bar azyq-túlik taýarlarynyń baǵasyn ustap turý baǵytynda birqatar jospar bar. Olar búgin QR Premer-Mınıstriniń orynbasary – Saýda jáne ıntegrasıa mınıstri Serik Jumanǵarınniń tóraǵalyǵymen ótken keńeste talqylandy, dep habarlaıdy Almaty-akshamy.kz Inform.kz- silteme jasap.
Jyl basynan beri negizgi azyq-túlik baǵasynyń ósýi 18,7% boldy.
Saýda jáne ıntegrasıa mınıstrligi Saýda komıtetiniń tóraǵasy Erjan Qazanbaev oblystardaǵy saýda ústemesi jónindegi komısıalar men monıtorıńtik toptardyń jumysy týraly máseleni kóterdi. Ol komısıalardyń jumysyn tolyǵymen qaıta qarap, azyq-túlik baǵasynyń qalyptasýyna tikeleı áser etip otyrǵan aradaǵy deldaldardy anyqtaýǵa jumyldyrýdy usyndy.
Ákimder men Aýyl sharýashylyǵy mınıstrliginiń negizgi azyq-túlikpen qamtamasyz etý týraly aqparatyn tyńdaǵan Serik Jumanǵarın aldaǵy kezeńge arnalǵan negizgi mindetterdi belgiledi.
«Negizgi áleýmettik mańyzy bar azyq-túlik ónimderin óndirýshiler qaýymdastyqtarymen kezdesý sesıasyn ótkizdik. Aınalym qarajatyn qarjylandyrý jáne bólý sqemasyn qaıta qaraıtyn bolamyz, ÁMAT-tyń bes ataýy boıynsha óndirýshilermen tikeleı kelisimshart jasasý sqemasyna kóshýdi josparlap otyrmyz. Bizdiń mindetimiz – tapshylyqqa jol bermeý jáne negizgi azyq-túlik ónimderi baǵasynyń ósý qarqynyn tómendetý. Eń bastysy – tolyq baqylaýdy, onyń ishinde óńirlik komısıalardyń qyzmetin baqylaýdy qamtamasyz etý. Deldaldardy anyqtaý boıynsha óńirlik komısıalar qurý – Memleket basshysynyń tapsyrmasy. Olardyń jumysyn Saýda jáne ıntegrasıa mınıstrliginiń óńirlik bólimsheleriniń resýrstary esebinen kúsheıtý qajet. Bul jumysty Saýda komıtetine tapsyramyn», - dedi Serik Jumanǵarın.