Jańa memlekettik jáne jekemenshik bilim berý obektilerin salý esebinen oryn tapshylyǵy qysqarady.
Bul týraly Almaty qalasynyń ákimi Erbolat Dosaev OKQ-da ótken Almaty qalasynyń áleýmettik ekonomıkalyq damýynyń 5 aıdaǵy negizgi qorytyndylary týraly sóılegen sózinde aıtty, dep habarlaıdy Almaty-akshamy.kz.
Halyq sanynyń birshama ósýine jáne jańa aýmaqtardyń qosylýyna baılanysty áleýmettik ınfraqurylymnyń tapshylyǵy aıtarlyqtaı qıyndyq týǵyzýda.
Osy máselelerdi sheshý úshin qalada «basqarylatyn tapshylyq» orta merzimdi saıasaty iske asyrylatyn boldy. Jańa memlekettik jáne jekemenshik bilim berý obektilerin salý esebinen oryn tapshylyǵy qysqarady.
Erbolat Dosaevtyń aıtýynsha, memlekettik mektepterdiń bastaýysh synyptaryn fılıal retinde turǵyn úı keshenderiniń birinshi qabattarynda ornalastyrý tetigi qarastyrylýda.
«Osylaısha, 2022 jyldyń basynan beri 3 316 oryndyq 54 jekemenshik balabaqsha ashyldy, osy jyldyń sońyna deıin taǵy 1 460 oryndyq 17 bala baqsha, onyń ishinde 560 oryndyq 2 memlekettik balabaqsha ashylatyn bolady (900 oryndyq 15 jekemenshik balabaqsha)»,- dedi qala ákimi.
Ákimniń sózine júginsek, bıyl orta bilim berý salasynda 13,8 myń orynǵa eseptelgen 18 obektini paıdalanýǵa berý josparlanyp otyr, onyń ishinde 10 750 orynǵa 11 jańa mektep (onyń 5-eýi 7 500 oryndyq memlekettik mektepter jáne 3 250 oryndyq 6 jekemenshik mektep), 1 270 orynǵa 5 qosymsha qurylys, 1 800 oryndyq 2 ǵımaratty satyp alý josparlanyp otyr (600 oryndy №94 mektep úshin 1,8 mlrd teńgege Ádilet koleji jáne 1200 oryndy Naýryzbaı aýdanynyń Shuǵyla shaǵynaýdanyndaǵy Qazaq Stroy mektebi).
Jyldyń sońyna deıin 3-6 jas aralyǵyndaǵy balalardy mektepke deıingi bilimmen qamtý 2,4%-ke (91%-ten 93,4%-ke deıin), mektepterdegi oqýshy oryndarynyń sany 5%-ke (279,1 myńnan 292,9 myń orynǵa deıin) ósedi.