Almaty qalasynyń polısentrlik damý ıdeologıasy aıasynda Alataý aýdanynda áleýmettik-ekonomıkalyq sala ilgerilep keledi. Bul týraly Almaty qalasy Óńirlik komýnıkasıalar qyzmetinde ótken baspasóz máslıhatynda aýdan ákimi Talǵat Malybaev málimdedi, dep habarlaıdy aqshamnews.kz
Onyń aıtýynsha, 2025 jyldyń alǵashqy bes aıynda aýdan ekonomıkasyna tartylǵan ınvestısıa kólemi 97,5 mlrd teńgege jetti, ótken jylǵy osy ýaqytpen salystyrǵanda 127%-ǵa artqan. Sonymen qatar, kásipkerlik te ósti. Tirkelgen bıznes sýbektileriniń sany 14%-ǵa kóbeıip, bul óz kezeginde salyq túsiminiń 48,4 mlrd teńgeden 66,8 mlrd teńgege deıin, ıaǵnı 38%-ǵa ósýine yqpal etken. Sonyń arqasynda 1 500 jańa jumys orny ashylypty.
«Ekonomıkalyq ósimniń arqasynda Alataý aýdanynyń búdjeti ótken jylmen salystyrǵanda 30%-ǵa ósip, shamamen 57 mlrd teńgege jetti. Bul bizge ınfraqurylymdy damytý men turǵyndardyń ómir sapasyn jaqsartýǵa qarjy bólýge múmkindik berip otyr», – dep atap ótti Talǵat Malybaev.
Aýdan ákimi sondaı-aq 2025 jyly jol ınfraqurylymyn jaqsartýǵa baǵyttalǵan aýqymdy baǵdarlamanyń júzege asa bastaǵanyn habarlady. 18 shaǵynaýdanda jalpy uzyndyǵy 86,4 shaqyrym bolatyn 172 kóshe ortasha jóndeýden óte bastady. Boraldaı (57 kóshe, 14,3 km) jáne Rahat-Mádenıet (107 kóshe, 36,3 km) shaǵyn aýdandarynda jańa jol salyna bastady. Saıyn kóshesin 3,2 shaqyrymǵa, Tilendıev kóshesin 10,5 shaqyrymǵa jáne Rysqulov dańǵylyn da uzartý jumysy júrip jatyr. Sonymen qatar, jalpy aýdany 15 myń sharshy metr bolatyn shuńqyr jóndelip, jumys áli jalǵasyp jatyr.