Elimizde temirjoldy belgilenbegen jerlerden kesip ótken 28 myńnan astam azamat ákimshilik jaýapkershilikke tartyldy. Bul týraly kóliktegi polısıa departamenti habarlady.
Jyl basynan beri temirjoldy ruqsat etilmegen jerlerden kesip ótken 28 589 adamǵa ákimshilik jaza qoldanylǵan, onyń ishinde adamdardyń jáne janýarlardyń qatysýymen bolǵan 1 161 oqıǵa tirkeldi. Ókinishke oraı, 55 azamat poıyz astyna túsip, olardyń jartysynan kóbi qaıtys boldy.
Kóliktegi polısıa departamentiniń bastyǵy Baqytjan Malybaevtyń aıtýynsha, demalys kúnderi Jetisý oblysynda júk poıyzy belgilenbegen jerden temirjoldy kesip ótip bara jatqan er adamdy qaǵyp ketip, ol alǵan jaraqattarynan sol jerde qaıtys bolǵan. Qazirgi tańda osy oqıǵaǵa baılanysty qylmystyq is qozǵalyp, tergeý amaldary júrgizilýde.
Malybaevtyń aıtýynsha, temirjoldaǵy qaıǵyly oqıǵalardyń kópshiligi azamattardyń temirjolda júrip-turý erejelerin saqtamaýy saldarynan oryn alady. Ol adamdardy temirjoldyń qaýipti aımaq ekenin túsinýge shaqyrady.
Kólik polıseıleri profılaktıkalyq is-sharalar barysynda azamattarǵa temirjol aımaǵynda qaýipsizdik erejelerin qatań saqtaýdyń mańyzdylyǵyn eskertip otyrady. Temirjol tóseminen ótpes buryn poıyzdyń nemese vagondardyń joqtyǵyna kóz jetkizý, sondaı-aq, sıgnaldy estý úshin qulaqqap pen bas kıimdi sheshý qajettiligi jıi aıtylady.