Memlekettik áleýmettik járdemaqylardyń mólsheri 1 qańtardan bastap ulǵaıdy.
Jyl basynan beri múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardy tóleýge respýblıkalyq búdjetten 244 mlrd teńge jumsaldy. Buǵan qosymsha Memlekettik áleýmettik saqtandyrý qorynan eńbekke qabilettiliginen aıyrylý jáne asyraýshysynan aıyrylý boıynsha shamamen 30,2 mlrd teńge somasyna áleýmettik tólemder júzege asyryldy, dep habarlaıdy Almaty-akshamhy.kz Eńbek jáne halyqty áleýmettik qorǵaý mınıstrligine silteme jasap.
1 shildedegi jaǵdaı boıynsha múgedektigi boıynsha MÁJ alýshylar sany shamamen 536,2 myń adamdy, asyraýshysynan aıyrylý jaǵdaıy boıynsha – shamamen 198,2 myń adamdy qurady.
Múgedektigi boıynsha jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri osy jylǵy 1 qańtardan bastap eń tómengi kúnkóris deńgeıiniń ulǵaıýyna baılanysty 8,5%-ǵa ósti, bıylǵy 1 shildeden bastap qosymsha orta eseppen 14,5%-ǵa ındeksteldi.
Mysaly, 1 shildeden bastap jalpy aýrýdan múgedektigi boıynsha MÁJ mólsheri 1-top úshin 89 248 teńgeni, 2-top úshin – 71 398 teńgeni, 3-top úshin – 48 681 teńgeni qurady.
Budan basqa, mindetti áleýmettik saqtandyrý júıesine qatysýshylarǵa áleýmettik táýekelder týyndaǵan jaǵdaıda MÁSQ-dan áleýmettik tólemder júzege asyrylady. Máselen, osy jyldyń bes aıynyń qorytyndysy boıynsha 92,2 myń adam eńbek etý qabiletinen aıyrylý boıynsha áleýmettik tólem, al 59,6 myńǵa jýyq otbasy asyraýshysynan aıyrylý boıynsha áleýmettik tólem aldy.
1 shildedegi jaǵdaı boıynsha eńbekke qabilettiliginen aıyrylý boıynsha áleýmettik tólemderdiń ortasha mólsheri 33 454 teńgeni, asyraýshysynan aıyrylý boıynsha – 34 423 teńgeni qurady.