Olardyń 70 paıyzǵa jýyǵy Ózbekstannan qonys aýdarǵan.
Ózgeleri Qytaı men Túrkimenstan, Mońǵolıa jáne basqa da elderden. Qandastarǵa qoldaý kórsetý maqsatynda qurylǵan "Otandastar" qorynyń málimetinshe, sońǵy jyldary ata jurtyna qaıtqysy keletin qazaqtardyń sany kúrt artqan, dep habarlaıdy Almaty-akshamy.kz.
2021 jyly Qazaqstanǵa Irannan 20 otbasy kóship keldi. Olardyń 14-i teriskeıde oryn tepti. Qandastardyń barlyǵy «Eńbek» baǵdarlamasy boıynsha jańa baspanaǵa ıe boldy.
«Men ótken jyly kelgenmin, 1 jyl bolady. Eki balam bar. Qazir tiginmen aınalysyp júrmin. Tort jasaımyn», - deıdi qandas Márıam Qazaq.
Márıamnyń ata-ájesi 1920 jyldary Keńes úkimetiniń solaqaı saıasatynan bas saýǵalap Irannan bir-aq shyqqan. Urpaqtary araǵa bir ǵasyr ýaqyt salyp, atajurtqa oraldy.Jyraqta júrse de, týǵan tilin umytpaǵan qazaqtyń qaısar qyzy áke amanatyn oryndady. Endi memlekettik grant alyp, kásip ashýdy armandaıdy.
«Jaqsy ómir súrip ketý úshin, bul kisilerge shamaly bolsa da qoldaý kerek. Biz óz tarapymyzdan aqparattyq qoldaý kórsetsek, ákimshilik tarapynan jumysqa turǵyzyp, úı berip, barlyq áleýmettik qoldaý sharalaryn berýge jumys jasap jatyr», - deıdi «Otandastar» qory aqparattyq qoldaý departamentiniń atqarýshy dırektory Gúlmıra Nurbaeva.
«Otandastar» qory alys-jaqyn shet elderdegi qazaqtarmen únemi baılanysta. Mamandardyń aıtýynsha, atamekenine oralǵysy keletinder kóp. Qazaqstan táýelsizdik alǵannan beri 1 mln 99 myńnan astam etnıkalyq qazaq atamekenine qonys aýdardy. Kósh áli de jalǵasady.