Tanymal jýrnalıs, veloshabandoz Ernat Rahmetolla Abaı Qunanbaıulynyń 180 jyldyǵyna oraı AQSH-ta velosherý ótkizýge bel býǵanyn aıtty, - dep habarlaıdy Aqshamnews.kz tilshisi.
Bul týraly ol áleýmettik jelidegi paraqshasynda bólisti.
"Kezekti velosherýimdi AQSH-ta ótkizýge beldi bekem býdym. Kórmegen el, júrmegen jer. “Kele qal, dámdi taǵam men jaıly tósegiń daıyn” dep kútip otyrǵan eshkimim de joq. AQSH-ty aýzyn aıǵa bilegen álemdegi eń alpaýyt, ekonomıka jáne áskerı jaǵynan №1 el ekenin bilemiz. Kólik, poıyz, ushaq emes, belesebetpen aralaýdyń qyzyǵy óz aldyna. Kóbirek kóresiń, jaqynyraq tanısyń. Árıne qıyndyǵy da bolady. Olardy sheshe bilý, tóze bilý – Abaı atam aıtpaqshy, jyly júrek, nurly aqyl, ystyq qaırat, minezdi qajet eteri sózsiz", - dedi ol.
Jýrnalıs AQSH-taǵy “Abaı velosherýinen” kúndelik jazyp, bólisip otyratynyn aıtty.
Aıta keteıik, bıyl uly Abaıdyń 180 jyl mereıtoıy atap ótiledi. Ol 1845 jyly 10 tamyzda Shyǵys Qazaqstan oblysy (burynǵy Semeı ýezi) Abaı aýdanynda (burynǵy Shyńǵystaý oblysy) Shyńǵys taýynyń baýyrynda dúnıege keldi.
Abaı ataqty Tobyqty rýynyń Yrǵyzbaı degen tobynan taraıdy. Ol aýyl moldasynan oqyp júrgen kishkentaı kezinen-aq zerektigimen kózge túsedi. Keıin ol Semeı qalasynda 3 jyldyq medrese tárbıesin alady.
Abaı kópti kórgen ájesi Zereniń tárbıesinde boldy. Sheshesi Uljan da aqyldy ananyń biri bolǵan. Ákesi Qunanbaı Óskenbaıuly orta jasqa kelgende atqa minip, el bıleý jumysyna aralasqan zamany, Reseı patshalyǵynyń Qazaqstannyń batysy men ortalyq aımaǵyn otarlap, el bıleý júıesin óz tártibine kóndire bastaǵan kez.