Qazaqtyń «Eńbektiń nany tátti» degen naqyl sózi qashan da ózekti. Shynymen de, keıde qarapaıym eńbek adamdarynyń eńbegi elenbeı qalyp jatady. Degenmen, olardyń qoǵamǵa qosqan úlesi óte zor. Búginde turmys qamyn oılap, tańnyń atysy men kúnniń batysy jumys isteımiz. Ásirese, úlken qalalarda jan baǵý ońaı emes. Qoǵamnyń eń qajetti qyzmetteriniń biri – qoǵamdyq kólik, al jolaýshylardy kerek jerine jetkizý osy salanyń mamandarynyń arqasynda júzege asady. Biz osyǵan baılanysty «Almatyelektrotrans» komýnaldyq №3 avtoparktegi 66-shy baǵyttyń jetekshisi, avtobýs júrgizýshisi Erjan Qarabaevpen suhbattastyq.
«Eńbektiń nany tátti...»
— Júrgizýshilikti qalaı bastadyńyz?
— Bala kezimde «Ikarýs» avtobýsyn júrgizetin úlken bir grek kisini kórdim. Eńseli, denesin túk basqan, kókirek tusyn ashyp júrgen, ústine qoıý-qyzǵylt jeıde kıgen sol júrgizýshi basymnan sıpap, «júrgizýshi bolasyń ba?» dep, maǵan úsh rúbl berdi. Sol kúnnen bastap, avtobýs júrgizýshisi bolýdy qaladym.
— Avtobýs júrgizýshisiniń bir kúni qalaı ótedi?
— Bizdiń kúnimiz kóńil-kúıimizge baılanysty ótedi. Qoǵamdyq kólikte túrli adamdardy kezdestiresiz. Bireýler jumysqa asyqsa, bireýler balabaqshaǵa barady, taǵy bireýleri emdelip qaıtqan jandar. Ártúrli sanattaǵy jolaýshylardyń ishinde jaǵymdy adamdardy kórip, jaqsy tilekter estisek, kóńilimiz kóterilip qalady. Qaıtyp kele jatqanda sharshaǵan jolaýshylardy kóremiz, sondyqtan kúni boıy ártúrli sezimder tolqynynda bolamyz. Keıde ishimdik urttap alatyndar da kezdesedi, olardyń ıisi avtobýs ishinde shydatpaı, jumysty aýyrlatyp jiberedi. Biraq basty maqsatymyz – jolaýshylardy aman-esen jetkizý.
Otbasym úshin eńbektenemin
— Bul jumysqa tabandylyq qajet pe?
— Árıne, bul jumysta tabandylyq óte mańyzdy. 16-17 saǵat boıy qoǵamdyq kólikti júrgizý ońaı emes. Tańǵy saǵat 4:30-da oıanyp, túngi saǵat 23:00-ge deıin jumys isteısiz. Bizge osy uzaq jumys kúnine tózý úshin úlken kúsh pen tózimdilik kerek. Jumystaǵy kúızelisten júıke sharshap, densaýlyqqa zıan kelýi múmkin. Meniń de múgedek balalarym bar, olardy asyraý, kútip-baǵý kerek. Bárin tózimdilikpen kóterip, otbasymyz úshin eńbektenemiz.
«Júrgizýshiniń jaǵdaıy jaqsarsa eken»
— Kásibińizdiń qıyndyǵy nede?
— Bul jumysta eń bastysy – júıke myqty bolýy kerek. Ár túrli sátterge daıyn bolý qajet. Bizge qaladaǵy Car city aımaǵynda avtobýs toqtaıtyn arnaıy turaq bar, onda №66, 65, 122, 110, 236 baǵytyndaǵy avtobýstar toqtaıdy. Sol jerge júrgizýshilerge arnalǵan asqana men demalys oryndary jasalsa degen tilegimiz bar. Bul suranysty bılik ókilderine jetkizgimiz keledi.
Sabyrly bolǵan ozady
— Erekshe este qalǵan oqıǵalar bar ma?
— Birneshe jyl buryn «Ipodrom» bazaryna úlken avtobýspen bardyq. Kedenniń kúsheıgen kezi edi, avtobýsymyzdan órt shyǵyp, jolaýshylardy aman-esen syrtqa shyǵaryp úlgerdim. Qıyndyqqa shydap, adamdardy qorǵap qalǵanym úshin ózimdi baqytty sezinemin.
Taǵy bir oqıǵada avtobýsta qalta urylaryn ustap, olardy sýyq qarýlarymen birge sulatqan kezder bolǵan. Alǵashynda qarapaıym júrgizýshi bolsam da, qaısarlyq kórsetip, talaı qıyndyqtan óttim.
«Saqtansań, saqtaıdy!»
— Qoǵamdyq kólik júrgizýshisi bolýdy armandaıtyn jastarǵa qandaı keńes berer edińiz?
— Jas júrgizýshilerge eń basty keńes – jaýapkershilik. Qoǵamdyq kólikte ár adamnyń taǵdyry seniń qolyńda turǵandaı seziný qajet. Kólik júrgizýde tek óziń úshin ǵana emes, jolaýshylar úshin de saq bolyp, uqyptylyq tanytý kerek. Sondyqtan jumysqa degen adaldyq pen adamdarǵa degen qurmet aldyńǵy orynda turady.
Qorytyndylaı kele, avtopark basshylyǵyna, áriptesterime jáne otbasymnyń qoldaýyna úlken rızashylyǵymdy bildiremin. Eń bastysy, denimiz saý bolsyn, alǵa qoıǵan maqsattarǵa qol jetkizip, eńbektiń qyzyǵyn kóre bileıik.