Premer-mınıstr avtomektepterdi esepke alýdy tapsyrdy.
Oljas Bektenov avtomektepterge qoıylatyn talaptardyń tómendeýi júrgizýshilerdi daıarlaý sapasy men júrgizý mádenıetine teris áser etkenin aıtty, dep habarlaıdy aqshamnews.kz úkimettiń baspasóz qyzmetine silteme jasap.
"Avtokóliktiń tehnıkalyq jaı-kúıi jol qozǵalysynyń qaýipsizdigine tikeleı áser etedi. Jyl saıyn elimizdegi avtopark sany ósip jatyr. Al avtokólikterdi tehnıkalyq tekserý sapasyz júrgiziledi", - dedi Bektenov.
Ol tehnıkalyq qyzmet kórsetý ortalyqtary bas paıdasyn ǵana oılap, jumys isteıtinin aıtty.
"Jol ústindegi qaýipsizdik jáne adamdardyń ómirin saqtaý máselesi jekelegen tulǵalardyń múddesinen bıik turýǵa tıis. Tehnıkalyq tekserý ortalyqtarynyń jumysyn jónge keltiretin ýaqyt jetti. Kólik mınıstrligine kólik quraldaryna tehnıkalyq tekserý júrgizý sapasyn tıimdi baqylaý tetigin ázirleýdi tapsyramyn", — dep atap ótti Bektenov.
Sonymen qatar, úkimet basshysy qazir oqý ortalyqtaryn ashý úshin lısenzıalar men ruqsattar talap etilmeıtinin, sondyqtan olardyń kópshiliginde qajetti materıaldyq baza joq ekenin de málimdedi.
"Búgingi tańda sapasyz daıyndyq úshin ákimshilik jaýapkershilikti alyp tastaǵandyqtan, oqý prosesi kóbinese formaldi túrde júzege asyrylady. İshki ister mınıstrligine múddeli memlekettik organdarmen birlesip barlyq avtomektepti esepke alý tapsyryldy. Sondaı-aq halyqaralyq tájirıbe taldanady jáne qajet bolǵan jaǵdaıda júrgizýshilerdi daıarlaý jáne júrgizýshi kýáligin alý tásilderi qaıta qaralady", - dedi premer-mınıstr.