Almaty sán jáne dızaın kolejinde qazaq poezıasynyń muzbalaǵy, halqymyzdyń aıaýly perzenti Muqaǵalı Maqataevtyń shyǵarmashylyǵyna arnalǵan "Muqaǵalı oqýlary" atty ádebı kesh ótti, dep habarlaıdy aqshamnews.kz
Bul rýhanı sharany kitaphana qyzmetkerleri Jandar S.I., Chaldıbekova J.B. jáne qazaq tili men ádebıeti pániniń oqytýshylary Smaılova A.Q., Baımýratova A.K., Nurseıt E.R uıymdastyryp, ony kórkemdik deńgeıi joǵary ádebı basqosýǵa aınaldyrdy.
Aqyn jyrlary júrekterdi eljiretip, jan dúnıeni terbedi. Óleń oqylǵan saıyn zaldaǵy atmosfera ózgeshe bir kúıge endi. Qazylar alqasy qatarynda otyrǵan Qazaqstannyń Qurmetti azamaty, aqyn Gúlnar Raqymjanqyzy, "Qurmet ıesi" syılyǵynyń ıegeri, aqyn Serikbol Ermahan, kolej ádiskeri, qazaq tili men ádebıeti pániniń oqytýshysy Kerimbekova J.R. jáne qalamger, kitaphanashy Aıjamal Joldasqyzy – bári de aqyn júreginiń náziktigin, jyrdyń sheksiz qudiretin jan-tánimen sezinip otyrdy. Olar árbir óleń oqylǵan saıyn kózine jas alyp, poezıanyń shynaıy qýatyn júrekpen qabyldady. Bul kesh – jaı ǵana saıys emes, jyrmen syrlasý, óleń arqyly júrekterdi tabystyrý sáti boldy. Muqaǵalı: "Aqyn bolý – júrek isi!" deıdi.
Osy keshte jas oqyrmandar sol aqyndyq júrektiń náziktigi men tereńdigin aıqyn sezindi. Óleń – jalań sóz emes, júrektiń úni ekenin uǵyndy. Stýdentter aqynnyń muralaryn jatqa oqyp qana qoımaı, onyń shyǵarmashylyǵyna arnalǵan esselerin usyndy, mánerlep oqýdyń sheberligimen erekshelendi. Kesh barysynda qoıylymdar qoıylyp, aqyn jyrlarynyń kórkemdigi jańa qyrynan tanyldy. Óleńge degen súıispenshilik - júrek baılyǵy. Kolej stýdentteriniń Muqaǵalı oqýlaryna degen talpynystaryn kórip, shynaıy qurmetimdi bildirgim keledi. Aqyn jyrlaryn júrekterińizben oqyp, onyń ár sózin sezine bilý – úlken óner. Keıde adam óz eńbeginiń baǵalanbaǵanyn sezinip, saǵy synyp, jigeri qum bolýy múmkin. Biraq Muqaǵalı da bir kezderi moıyndalmaǵan, onyń jyrlaryn túsinbegender boldy. Soǵan qaramastan, ol toqtamady. Eger ol jazýdy doǵarǵanda, biz búgin osyndaı uly poezıadan aıyrylyp qalar edik. Sizderge tilerim – ózderińizge senińizder, armandaryńyzdan bas tartpańyzdar! Búgin oqyǵan ár óleńińiz – sizdiń bolashaǵyńyzǵa jazǵan izińiz.
Eger Muqaǵalı: "Men ómirdi jyrlaý úshin kelgenmin!" – dep aıtsa, sizder de óz joldaryńyzdy taýyp, ony súıispenshilikpen júrińizder. Qansha qıyndyq kezdesse de, osy álemge óz izińizdi qaldyrýǵa kelgenińizdi umytpańyz! Búgingi shabyt – erteńgi jetistikke bastar jol. Kesh sońynda qazylar alqasy jastardyń óleńge degen súıispenshiligin joǵary baǵalap, árbir ónerpazdyń júreginen shyqqan jyrdyń ózindik boıaýy men áserin atap ótti. Olar úshin bul keshtiń qazylar alqasynda bolýdyń ózi bir baqyt edi. Sebebi aqyn júregi – jyrdyń mekeni, al jyrdy tyńdaı bilý – júrektiń eń asyl qasıeti. Muqaǵalı jyrlary ǵasyrdan ǵasyrǵa jalǵasyp, qazaq rýhanıatynyń shamshyraǵy bolyp qala bermek!