Ulty orys, jany qazaq Mıhaıl
Joldastary Mıhaıldy Mádı dep atap ketken. Ol «Qarajorǵa» bıin ózi qyzyǵyp, teledıdardan kásibı bıshilerdiń is-qımylyn qarap otyryp úırengen, dep habarlaıdy Almaty-akshamy.kz
Al qazaqshasyn ósken ortasynda qalyptastyrypty. Ol kishkentaıynan qazaq otbasynyń balalarymen dos bolǵan, birge oınaǵan.
Arys turǵyny Mıhaıl Krokýs ulty orys bola tura, qazaqsha taza sóıleıdi. Tipti óleń shyǵaryp, "qarajorǵa" bıleıtin óneri de bar. Ol 4 jyldan beri oraza ustap, juma saıyn meshitke barady.
«1998 jyly dúnıege keldim. 9-synypqa deıin Leńgir qalasyndaǵy qazaq mektebinde bilim aldym. Al keıinnen Arysqa qonys aýdaryp, osyndaǵy orta mektepti bitirdim. Qazir eki tilde de erkin sóıleımin», – deıdi Mıhaıl Krokýs.
Mıhaıl Krokýs — İİM-ge qarasty Almaty akademıasynyń túlegi. Eńbek jolyn Arys qalalyq polısıa bóliminde «jedel áreket etý» bóliminde bastaǵan. Qazir ýchaskelik polısıa ınspektory qyzmetin atqaryp júr.
«Men qaraıtyn aýmaqta 3000-ǵa jýyq halyq, mektep, toıhana, dúken jáne ózge de áleýmettik nysandar men kásipkerlik qurylymdar bar. Tańerteń erte kósheni aralap, aqsaqaldarmen kezdesemin. Qoǵamdyq tynyshtyqty saqtaý maqsatynda qyzmet etip kelemin», – deıdi leıtenant.
Sonymen qatar Mıhaıl mádenı sporttyq is-sharalarǵa da únemi qatysyp otyrady. Oblystyq «Parasatty polıseı» baıqaýynda bas júldeni jeńip alǵan. Al respýblıkalyq saıysta úshinshi oryndy enshilepti.
«Jaqynda Nur-Cultanda ótken «Tatýlyq – táýelsizdiktiń tiregi» atty respýblıkalyq saıysqa qatystym. Memlekettik tildi meńgergen ózge ult ókilderine qoldaý kórsetý, memlekettik tildi nasıhattaýmen qatar ishki ister organdarynda tildik ortany qalyptastyrý maqsatynda ótken baıqaýǵa 19 polısıa qyzmetkeri qatysty. Sonda ózim shyǵarǵan óleńmen tanystyrýymdy aıtyp, qarajorǵa bıledim. Kórermen kózaıymyna aınalyp, İİM Alǵys hatymen marapattaldym», - deıdi ol.
Mıhaıl Krokýs jaqynda otbasyn qurǵan. Búginde jubaıy Aıdana ekeýi alǵashqy sábıin kútip otyr.