Bıyl Erevanda ótetin Junior Eurovision-2022 baıqaýyna Qazaqstannan Davıd Charlın qatysady. Ol - «Baqytty Bala-2022» IV halyqaralyq baıqaýynyń fınalısi. Qazaqstandyqtar jas ónerpazymyzdy fınalda jáne odan keıin de daýys berý arqyly ónerpazǵa eki jolmen qoldaý kórsete alady. Ol úshin:
- https://junioreurovision.tv/ nemese https://jesc.tv/ siltemesine ótý;
- baıqaýdyń barlyq qatysýshysynyń kompozısıasy bar qysqa beınerolıkti kórý;
- Davıd Charlındi jáne ózińiz daýys bergińiz kelgen taǵy eki qatysýshyny tańdaý;
- paraqshanyń tómengi tusynda «Daýysty qabyl alý» nemese «Submit my votes» batyrmasyn basý qajet. Daýys berý - tegin.
Daýys berýdiń birinshi kezeńi 10 jeltoqsanda Astana ýaqytymen saǵat 01:00-de bastalyp, 11 jeltoqsan kúni saǵat 20:59-da aıaqtalady. Daýys berýdiń ekinshi kezeńi saıtta qatysýshylar óner kórsetip bolǵannan keıin 15 mınýtqa ǵana qoljetimdi bolady.
Junior Eurovision 2022 halyqaralyq baıqaýynyń Grand-fınaly 11 jeltoqsan kúni Erevanda ótedi. Davıd Charlınniń ónerin «Habar» telearnasynyń tikeleı efırinen 11 jeltoqsanda Astana ýaqyty boıynsha saǵat 21:00-de tamashalaýǵa bolady. Baıqaýda qazaqstandyq ánshi 3-shi bolyp óner kórsetip, «Jer-Ana» atty jańa kompozısıany oryndaıdy.
Junior Eurovision 2022 baıqaýyna Qazaqstannan basqa Eýropanyń 15 memleketiniń jas oryndaýshysy qatysady. Elimizdiń osynaý aýqymdy baıqaýǵa qatysýy «Habar» agenttiginiń 2016 jyly Eýropalyq Habar taratý odaǵyna (EVU) múshelikke qabyldanýynyń arqasynda múmkin bolyp otyr.
Atalmysh baıqaýdyń jeńimpazy Ulttyq júrıdiń daýys berýi jáne onlaın-daýys berý arqyly anyqtalady. Daýys berý júıesi burynǵydaı: 50% qazylar alqasy sheshedi jáne 50% telekórermenniń onlaın-daýys berýine baılanysty bolady.
Aldyńǵy jyldary ónerpazdarymyz ulttyq júrıden joǵary balǵa ıe bolǵanymen, qazaqstandyq kórermender belsendiliginiń tómendiginen bas júldeni ıelene almaı qalyp júr. Sondyqtan sizderdi Qazaqstanǵa, Davıd Charlınge belsendi túrde daýys berýge shaqyramyz.