Eńbek adamy
Jumyssyzdyq – áli de kún tártibinde turǵan ózekti taqyryp. Osy máseleniń túıinin sheshý maqsatynda qurylǵan Halyqty jumyspen qamtý ortalyǵy júıeli jumystar atqaryp keledi.
Máselen, mekeme qalada bos jumys oryndary jármeńkesin jıi uıymdastyrady. Sondaı-aq, basqarma mamandary jumys izdep júrgen jandarǵa túıindemeni qalaı toltyrý kerektigin, ony mekeme-kásiporyndarǵa qalaı ótimdi etip usyný joldaryn úıretedi. Sonymen qatar, «bizge kelińiz, jumys bar» dep shaqyratyn kásiporyndar men mamandyq túrlerin jalpyǵa qoljetimdi aqparat resýrstaryna, gazet, saıttarǵa, onyń ishinde Enbek.kz portalyna júıeli túrde jarıalap otyrady. Aıtarlyqtaı nátıjeler bar. Máselen, byltyr Almaty boıynsha 19 125 jumyssyz azamat turaqty jumyspen qamtamasyz etildi. Al bıyl jyl basynan beri 2500-den astam adam jumys tapqan. Odan tys, áleýmettik, qoǵamdyq jumystarǵa tartylyp, otbasylyq-turmystyq jaǵdaıyn jaqsartyp jatqan azamattar da kóp.
Jalpy, eńbek naryǵynda qyzmet kórsetý salasy men qurylys mamandaryna suranys joǵary. Atap aıtsaq, satýshy, tiginshi, menedjer, merchendaızer, kasır, kontroler, kúzetshi, qurylys jumysshylaryn, beton quıýshy, jol jumyskerlerin, júrgizýshi, kondıter, aspaz, daıashy, júrgizýshiler izdeıtin mekemeler kóp. Odan soń tehnologıa salasy boıynsha programmısterge, júıelik ákimgerlerge suranys bar. Qalada keıingi ýaqytta balabaqshalar kóptep ashyla bastaǵandyqtan, tárbıeshiler de kerek. Al iri kompanıalar esepshi, qarjy mamandaryn kóbirek izdeıdi. Eń jıi jumys usynatyn jáne «eki qolǵa bir kúrek izdep» júrgen adamdardy turaqty jumyspen qamtamasyz etetin mekemeler týraly aıta keter bolsaq, olardyń qatarynda «Magným», «Sýlpak», «Aqsaı nan», «Dastarhan», «Obıs» jaýapkershiligi shekteýli seriktestikteri jáne «Almaty jylý júıesi» AQ men «Almatyelektrotrans» bar.
Biz alystan emes, úıinde otyryp-aq memlekettik Enbek.kz saıty arqyly Almatydan turaqty jumys tapqan jas maman Marat Hasenovty sózge tartqan bolatynbyz.
– Osy qaladaǵy konservatorıany bitirgenmin. El jaqta, Qyzylorda oblystyq mádenıet úıinde biraz jumys istep keldim. Basymyz jas degendeı, úlken qalada baǵymdy synap kórmekke Almatyǵa taban tiregen bolatynmyn. Árıne, bastapqyda jumys tappasam qalaı bolady degen azdaǵan qorqynysh boldy. Biraq tabıǵatymnan táýekelshil adam bolǵandyqtan, senimge, dıplomyma kóbirek ıek arttym. Jasyratyny joq, jarty jyldaı jumyssyz júrip qaldym. Mamandyǵyma saı jumys tappadym. Burynǵy jumysymdy Enbek.kz saıty arqyly tapqan bolatynmyn. Bul joly da sol memlekettik portalǵa júgindim. №72 jalpy bilim beretin mekteptiń mýzyka páni muǵalimi vakansıasy tabyla ketti. Áńgimelesýge shaqyrdy, keldim, qabyldandym. Jańa oqý jylynan beri osynda eńbek etip júrmin. Ujymǵa sińisip kettim. Bárinen de tańerteń kishkentaı dostaryma asyǵyp jetemin. Qazirgi balalar baıaǵy biz sıaqty emes, oıyn, pikirin, jaqsy kórip turǵanyn ashyq bildiredi. Bári seni esikten kórgennen japatarmaǵaı júgirip kelip, qushaqtap, biz sizdi saǵyndyq dep amandasqanda, eljirep ketesiń. Jumysyńnan shabyt alýdyń ózi bir ǵanıbet! Boıymdaǵy bar jaqsyny sol armanshyl, bilimge qushtar órenderge sarqyp bergim kelip turady, – deıdi toǵyz aspapta erkin oınaıtyn jas maman, mýzyka pedagogy Marat Baltabaıuly.
Aıtpaqshy, Marat aınalasynda júrgen birneshe jigitke jumysty tanystaryn jaǵalap emes, Enbek.kz saıty arqyly izdeýge keńes berip júrgenin jáne birneshe tanysy jumysty solaı tapqanyn da aıtyp qaldy. Iá, izdegen adam – tabady.