Ulybrıtanıada jumys kóp, biraq jumys kúshi jetispeıdi.
Breksıt Eýropadan keletin mıgranttarǵa tosqaýyl qoıyp tastaǵaly eńbek naryǵyndaǵy jaǵdaı kúrdelene tústi, -dep habarlaıdy Almaty-akshamy.kz. Karantınnen keıin jumysqa shyqpaı qoıǵan egde jastaǵy kisiler de jyǵylǵanǵa judyryq bolyp otyr. Kadr tapshylyǵyna tap bolǵan mekemeler jumys kúshin tartý úshin halyqty joǵary jalaqymen qyzyqtyrýǵa májbúr. Biraq bul tyǵyryqtan shyǵýdyń joly ma? Ulybrıtanıada jumys isteıtin adamdar jetispeıdi. Ásirese halyqqa qyzmet kórsetý salasynda maman tapshy. El Eýropalyq odaq quramynan shyqqannan keıin eńbek-mıgranttary týǵan jerlerine oralǵan. Al Eýroodaq quramyna kirmeıtin memleketterden kelgen jumysshylar olardyń ornyn toltyra almaı otyr. Elde bos jumys oryndary mıllıonan asqandyqtan jumysshylarǵa degen talas kúsheıe tústi. Jumys berýshilerdiń joǵary jalaqymen qyzyqtyrýdan basqa amaly qalmaǵandaı, dep jazdy 24.kz.
- Eger jaǵdaı bulaı jalǵasa beretin bolsa, bıznesimizdiń saqtalýy neǵaıbyl. Gaz ben jaryqtyń baǵasy shamamen 70 prosentke ósti. Jumys kúshine tólenetin jalaqy artty. Al baǵalarymyzdy 8 prosentke ǵana qymbattattyq. Osylaısha kirisimiz azaıdy. Kóktemde aılyq ótken jylmen salystyrǵanda 7,2 prosentke artqan. Bul óte joǵary kórsetkish. Biraq báribir 8,7 prosentti quraıtyn ınflásıadan tómen. Demek jalaqy kólemi 2,8 prosentke túsip ketti degen sóz, - deıdi kafe ıesi Pıter Nıl.
- Optımızm turǵysynan alyp qaraǵanda jalaqynyń kóbeıýi jumysshylar úshin jaqsy. Biraq bul ekonomıka úshin tıimsiz. Iaǵnı ınflásıanyń sharyqtaýyna sebepshi bolady. Anglıa banki prosenttik mólsherlemeni taǵy kóterýi múmkin. Bul óz kezeginde nesıesi barlardy tyǵyryqqa tireıdi. Koronavırýstyń ekinshi tolqynynan keıin jumys isteıtin egde jastaǵylardyń sany azaıdy. Olardyń keıbiri ýaqytynan buryn zeınet demalysyna shyǵyp ketti. Uzaq naýqastanǵan adamdardyń sany rekordtyq deńgeıge jetip, eńbek naryǵynyń aıasy taryldy. Qarjy salasyna jaýaptylardyń pikirinshe, baǵa áli de ósedi, -degen pikir bildirdi sarapshy Entonı Greılıng.
- Málimetterge sáıkes, eńbek naryǵyndaǵy jaǵdaı qıyn bolyp tur. Bos jumys oryndaryn usynýshylar azaıyp keledi, biraq bul óte baıaý qarqyn alýda. Inflásıa deńgeıiniń tómendeıtindigine senimdimiz. Biraq biz boljaǵandaı emes, buǵan kópteý ýaqyt keteıin dep tur. Eńbek naryǵyndaǵy kúrdeli jaǵdaı ınflásıaǵa keri áserin tıgizip, ekonomıkalyq ósimdi shekteýi múmkin. Keıbir memlekettik qaryzdardyń da kólemi artpaq. Elde ómir súrý quny qymbattaǵandyqtan kezinde Breksıtti qoldaǵandar raıynan qaıtyp jatyr. Buǵan saýalnamalardyń qorytyndylary dálel, degendi alǵa tartady Anglıa bankiniń basqarýshysy Endrú Beılı.