Astana qalasynyń Nura aýdanynda kólik quraldaryn tehnıkalyq qyzmet kórsetý, jóndeý jáne paıdalaný salasyndaǵy kásiporyn ókilderi men Astana qalasy ákimdiginiń Kásiptik-tehnıkalyq koleji basshylyǵynyń kezdesýi ótti. Sharada oqý orny túlekterin jumyspen qamtý, dýaldy oqytýdy damytý jáne seriktestikti keńeıtý máseleleri sóz boldy.
Kolej dırektory Rımma Imanǵazınovanyń aıtýynsha, bul oqý orny elordada kólik jóndeý jáne qyzmet kórsetý mamandaryn daıarlaıtyn jetekshi bilim berý mekemesi sanalady.
«Nura aýdanynda avtokólik jóndeýmen aınalysatyn 40-qa jýyq iri kásiporyn jumys isteıdi. Sondyqtan biz olarǵa oqý bazamyzdy, stýdentterimizdiń daıarlyǵyn kórsetýdi mańyzdy dep eseptedik», – dedi kolej basshysy.
Kolej dýaldy oqytý júıesimen jumys isteıdi: 60% – óndiristik tájirıbe, 40% – teorıalyq bilim. Qazirgi tańda shamamen 40 kásiporynmen kelisimshart jasalǵan. Jyl saıyn kolej 100-150 maman daıyndaıdy, olardyń qatarynda dánekerleýshiler, elektrıkter, qurylysshylar, aspazdar, tiginshiler jáne kondıterler bar. Barlyǵy – 11 mamandyq jáne 16 biliktilik boıynsha.
Oqý merzimi – úsh jyl. Birinshi jyly – jalpy bilim berý, al ekinshi kýrstan bastap kásibı daıyndyq pen óndiristik tájirıbe bastalady. Stýdentter 1400 saǵattan astam tájirıbe jınaqtap, kásiporynda jumys isteý múmkindigine ıe bolady.
Nura aýdany ákiminiń orynbasary Álıa Ábsemetova kezdesýdiń mańyzyn atap ótip:
«Prezıdent 2025 jyldy Jumysshy mamandyqtar jyly dep jarıalady. Bul – der kezinde jasalǵan sheshim. Kolej stýdentteri erteńgi kúni qala úshin naqty paıda ákeletin mamandarǵa aınalady. Sondyqtan biz seriktes kompanıalar sanyn arttyryp, naqty tájirıbelik múmkindik berýdi kózdep otyrmyz», – dedi ol.
Kezdesý qorytyndysy boıynsha kolej ben jumys berýshiler praktıkaǵa negizdelgen oqytýdy, kadrlarǵa maqsatty suranys berýdi jáne mamandar daıarlaýdaǵy yntymaqtastyqty kúsheıtýge ýaǵdalasty.