Aktrısanyń aıtýynsha, ol ishi-baýyryna kirip, muńyn tyńdap, syryn bilip alǵan eken.
Aktrısa ári telejúrgizýshi Juldyz Ábdikárimova jaqynda jaqyn adamyn sotqa beretinin aıtty, dep habarlaıdy aqshamnews.kz
«Ol kezder men úshin synaqty kúnder edi. Janym qınalyp, aınalamnan aqyl suraıtyn adam tappaı, basymdy taýǵa da, tasqa da soǵyp júrgem. Sóıtip sendelip júrgende kúndeı jarq etip, aldymnan bir kisi shyqty. Bálkim, meniń qutqarýshym osy bolar degen oı jylt etti. Sodan ol adam ishi-baýyryma kirip, muńymdy tyńdap, syrymdy bilip, úıimnen talaı as ishti. Sóıtsem, onyń óz jospary bolǵan eken. Adamnyń alasy ishinde, maldyń alasy syrtynda», - dep jazdy Juldyz Ábdikárimova.
Ábden senimine kirip alǵan álgi adam aktrısaǵa birneshe qujatqa qol qoıdyryp alypty.
«Qıt etse halimdi surap, meniń basymdaǵy problemamdy ózinikindeı kórip, ýaıymdap júrdi. Men bolsam eshteńeden habarym bolmaı, Jaratqanǵa alǵys aıtýmen boldym. Qysqasy, qasymda jarty jyl júrip, mendegi bar qundy dúnıeni sanap júrgen eken. Men óz qaıǵymnan esimdi jıa almaı júrgende, ol biraz qujatqa qolymdy qoıdyryp aldy. Erteń sol kisimen kezdesýge baramyn. Másele sheshilmese sotta kezdesemiz. Eger oqyrmanym talap etse, sottyń ashyq túrde, el aldynda onlaın translásıalanýyn talap etemin. Sotta oqıǵa búge-shúgesine deıin aıtylady. Ádil óterine senemin. Ol adammen 2 jyl boıy telefonmen sóılesken áńgimeniń barlyǵy zańdy túrde deloǵa tigildi», - dep jazdy aktrısa.