8 naýryz Halyqaralyq áıelder kúnine oraı elordalyq temirjol vokzaldarynyń perrondary men poıyzdarda júzden astam áıel jolaýshylarǵa gúlder men syılyqtar tabystaldy.
Áıelder qaýymyna saksofon áýeni merekelik kóńil-kúı syılyp, al poıyzdyń ishinde daýys ulǵaıtqysh arqyly tilekter aıtyldy, dep habarlaıdy almaty-akshamy.kz «Jolaýshylar tasymaly» AQ baspasóz qyzmetine silteme jasap.
Syılyq alǵan áıelder qaýymy yqylas lebizderin aıtyp, jolserikterge alǵystaryn bildirdi. Sondaı-aq, bul kúni elimiz boıynsha 8 Naýryz merekesine arnaıy bezendirilgen poıyzdar jolǵa shyqty. Ulttyq tasymaldaýshy mereke kúnderi názik jandardy jyl saıyn quttyqtaýdy jaqsy dástúrge aınaldyryp otyr. Barlyq oblystarda jolaýshy áıelderdi quttyqtaý sharalary ótkizilýde.
Aıta keteıik, jyl saıyn «Jolaýshylar tasymaly» AQ poıyzdarynda orta eseppen 13 mln astam jolaýshy qatynaıdy, olardyń ishinde jartysy áıelder qaýymy.
