Kóktem kelip kóshelerdiń opyrylǵan jerlerin qazyp, aǵymdaǵy jóndeý jumystary qarqyndy júrgizilýde. Osy rette Jol aktıvteriniń ulttyq sapa ortalyǵy Almaty fılıalynyń dırektory Máýlen Toqtarbaıuly Álipovtiń jol sapasyna qatysty saýaldarymyzǵa qatysty pikirin bilip edik.
- Jalpy bıylǵy jylǵa qandaı jańalyqtaryńyz bar? Asfálttyń sapasyn arttyrý jaǵyn qaradyńyzdar ma?
- Almaty qalasy boıynsha Naýryzbaı, Almaly, Medeý aýdandarymen aǵymdaǵy jóndeý jumystary bastalyp ketti. Qazirgi tańda jalpyǵa ortaq paıdalanylatyn kóshe jelisi joldaryn ortasha jóndeýge vedimistik saraptama júrgizý jumystary júrgizilip jatyr. Qalalyq avtobýs júretin jolaqtar men turaqtardyń jazǵy ýaqytta aýa temperatýrasynyń joǵarlaý kezindegi aýyr kólikterdiń salmaǵynan joltaban (koleıa), ıaǵnı oıylyp ketý aqaýlarynyń aldyn alý maqsatynda ár túrli polımer qospalaryn qosý arqyly eksperımentaldy asfáltbeton jabyndysyn tóseý tájirıbesi qaralýda. Oǵan qosa, ákimdiktiń tikeleı tapsyrmasymen ǵalymdar toby jumylyp, gıbrıdtik asfáltbeton qospasyn oılap tabýdy qolǵa alǵan. Bıyl asfáltbeton jabyndysynyń sapasyna aǵymdaǵy jáne ortasha jóndeý jumystaryna erekshe nazar aýdarylýda.
- Ótken jyly Almaty qalasy aýdandarymen kelisimshartqa qol qoıdyńyzdar. Endi kóshelerdi tekerýge shyǵyp jatyrsyzdar ma?
- Aldyńǵy 2023 jylǵa qaraǵanda bıylǵy jyly Almaty qalasy boıynsha 8 aýdanmen kelisimshartqa otyrdyq, sáıkesinshe tekserý aýqymy da joǵarylady. Qazirgi tańda kóshe jelilerine aǵymdaǵy jóndeý jumystary boıynsha tekserýler júrgizilip jatyr. Barlyq jumystar kelisimshart negizinde, jospar boıynsha iske asýda. Joǵaryda atap ótkendeı, vedimistik saraptama, avtomobıl joldaryn tehnıkalyq qujattamasyn daıarlaý jumystary da oryndalyp jatyr.
- Máselen, tómengi Kemel shaǵyn aýdany jaqtaǵy kóshelerdi ótken jyly jamaǵan edi. Bıylǵy jyly syn kótermeı, oıylyp, ketti. Bul ótken jyly sapasyz jamaýdyń saldary ekeni anyq. Qandaı shara qoldandyńyzdar?
- Sapany baqylap ustaý jumystary arnaıy retpen júzege asady. Jol salynyp jatqan nysanǵa ınjenerlerimiz baryp synama alady, sodan keıin zerthanada alynǵan synamalarǵa saraptama jasalady. Tekserý qorytyndysy boıynsha jol salǵan merdiger kompanıa men tapsyrys berýshige hat joldanady. Zertteý barysynda alynǵan synama normatıvtik talaptarǵa sáıkes bolmaǵan jaǵdaıda merdiger kompanıa óz qarajatyna qaıta jóndeý jumystaryn júrgizedi. Soǵan mindetteledi. Osylaısha, baqylaý jumystary egjeı-tegjeıli júrgiziledi.
Al Kemel shaǵynaýdany boıynsha bizdiń mekemege Jetisý aýdany ákimdiginen tek jol qurylys materıaldaryn alýǵa usynys túsken. Alynǵan materıaldar synaqtan ótip, oń baǵa berilgen. Al jumystyń tehnologıasyn tekserýge múmkindik bolmady. Sebebi aýdannan usynys bolmady. Biz óz erkimizben nysanǵa tekseris júrgize almaımyz, ókinishke qaraı.