Óńirler boıynsha kezekti jumys sapary barysynda Kólik mınıstri Marat Qarabaev Jezqazǵannan Qyzylordaǵa respýblıkalyq mańyzy bar joldardy qaıta jańartý ýchaskelerin qaraý úshin avtokólikpen júrip ótti.
Qyzylorda oblysynda China Civil Engineering Construction Corporation merdigerlik uıymynyń bazasynda vedomstvo basshysy «QazAvtoJol» UK» AQ jáne 5 qurylys kompanıasynyń qatysýymen úlken keńes ótkizdi, dep habarlaıdy Almaty-akshamy.kz Kólik mınıstrligine silteme jasap.
«Qyzylorda-Jezqazǵan» avtojolynyń ýchaskelerin rekonstrýksıalaý máseleleri jóninde ótken keńeste sheteldik jáne otandyq jol qurylysshylary óz jumysyn nátıjeli atqara almaǵan merdigerler budan bylaı Qazaqstannyń jańa jol jobalaryna qatysa almaıtyny týraly eskertildi
Uzyndyǵy 208 km «Qyzylorda-Jezqazǵan»trassasyn rekonstrýksıalaý jobasyn EQDB qarjylandyrady jáne joldy III tehnıkalyq sanattan II tehnıkalyq sanatqa aýystyrýdy kózdeıdi. Qazirgi ýaqytta jańa asfáltbeton jabyny boıynsha 85 km qozǵalys ashylyp, jumystardy 2024-2025 jyldary tolyq aıaqtaý josparlanǵan.
«Qyzylorda-Jezqazǵan» jobasy 6 ýchaskeden quralǵan. 2021 jyldyń sońynda 67 shaqyrymnan 216 km-ge deıingi tórt ýchaske boıynsha kelisimsharttarǵa qol qoıylǵan. Merdigerlerkompanıa atalǵan ýchaskelerdi 2024 jyly tapsyrýy kerek. 1 jáne 2-ýchaskeler boıynsha konkýrs berilgen ótinimderdiń JSQ somasynan asyp ketýine baılanysty qaıta ótkizildi. Nátıjesinde «Qyzylorda qalasyn aınalyp ótý qurylysy» №1 ýchaskesi basqa qarjylandyrý kózi arqyly iske asyrý úshin EQDB kelisimi boıynsha jobadan alynyp tastaldy. №2 ýchaske boıynsha kelisimshartqa 2023 jyldyń mamyr aıynda qol qoıylǵan, alaıda merdiger uıymdar tarapynan joba qunyn ulǵaıtý qajettiligi týraly másele kóterilýde.
Osyǵan baılanysty qurylysshylarmen áńgimelesý barysynda Qazaqstandaǵy jol jobalaryn qarjylandyrýdyń atalǵan máseleleri men jańa tásilderine basty nazar aýdaryldy. Atap aıtqanda, Marat Qarabaev merdigerlerge budan bylaı jol jobalaryna qatysty qoldan qymbatshylyq jasaýlaryna jol berilmeıtinin qatań eskertti.
«Keıbir kompanıalar jumys bastalǵan alǵashqy jyly jumystardy ádeıi keshiktirip, úshinshi-tórtinshi jyly qymbattaý máselesin alǵa tartady. Osyndaı tájirıbege tap bolyp otyrmyz. Bul rette «eń basynda kelesilgen somadan artyq eshteńe berilmeıdi» dep birden aıtamyn. Buryn-sońdy basqa ýchaskelerde, atap aıtqanda «Qaraǵandy – Balqash» jáne «Taldyqorǵan – Óskemen» ýchaskelerinde jumys istegen áriptesterińizdiń tájirıbesine qarańyzdar. Bul barshaǵa sabaq bolyp, endi qaıtalanbaıdy. Budan bylaı jol jobalaryna qatysty qoldan qymbatshylyq jasaýlaryńyzǵa jol berilmeıdi. Qolyńyzdan kelmese, kelisimshartty buzyp, jumysty sol jerden toqtatyńyz. Bul barlyq merdiger men jol jobalaryna qatysty aıtylyp otyr», - dedi mınıstr.
Ol sondaı-aq QR Kólik mınıstrligi óz tarapynan jobalar qunynyń qymbattaýynan ózge basqa barlyq másele boıynsha jol qurylysshylaryna árdaıym kómek kórsetýge daıyn ekenin atap ótti.
Marat Qarabaev memlekettik organ teris tájirıbesi bar kompanıalar Qazaqstannyń jańa jol jobalaryna qatysa almaıtyndaı etip zańnamaǵa ózgerister engizýge bastamashy bolǵanyn aıtty.
«Qara tizim» buryn da bolǵan, alaıda qazir atalǵan normany paıdalaný aıasyn odan ári keńeıtkimiz keledi. Sondyqtan elimizge alǵash ret kirip jatqan kompanıalar birden ózderine «Qazaqstanǵa uzaq ýaqyt jumys isteýge keldik pe álde joq pa?» degen suraqqa jaýap berýleri kerek. Óıtkeni aldaǵy 6 jylda 8 myń shaqyrymǵa jýyq jolda qurylys jumystaryn júrgizý josparlanyp otyr», - dep eskertti mınıstr.
Sondaı-aq vedomstvo basshysy merdiger uıymdarǵa jobalarǵa tolyqqandy daıyndyqpen kirisý qajet ekenin eske saldy.
«Barlyq qajetti tehnıkany ózderińizben birge alyp kelip, uzaq merzimge eń jaqsy qyzmetkerlerdi jaldańyz. Eger merdiger jobaǵa kirisip, alaıda tehnıkany satyp alý úshin bizden avans kútip otyrsa, biz qoshtasýǵa májbúr bolamyz. Mundaı tájirıbe biz úshin tańsyq emes», - dedi kólik salasyna jaýapty mınıstr.
Óńirler boıynsha kezekti jumys sapary barysynda Kólik mınıstri Marat Qarabaev Jezqazǵannan Qyzylordaǵa respýblıkalyq mańyzy bar joldardy qaıta jańartý ýchaskelerin qaraý úshin avtokólikpen júrip ótti. Qyzylorda oblysynda China Civil Engineering Construction Corporation merdigerlik uıymynyń bazasynda vedomstvo basshysy «QazAvtoJol» UK» AQ jáne 5 qurylys kompanıasynyń qatysýymen úlken keńes ótkizdi.