Sońǵy ýaqytta buqaralyq aqparat quraldarynda jáne áleýmettik jelilerde «Joǵarǵy Sot mektepterde oramal taǵýdy zańdy dep tapty» degen jalǵan málimetter taraýda, dep habarlaıdy aqshamnews.kz
Joǵarǵy Sottyń sheshimi mektepterdegi oramal taǵý máselesine tikeleı qatysy joq. İsti qaraý barysynda Joǵarǵy Sottyń ákimshilik ister jónindegi sot alqasy bilim berý mekemesinde oramal taǵýdyń zańdylyǵyn talqylaǵan joq.
Sheshimniń negizgi mazmuny – mekteptiń oqýshyny sabaqqa jibermeýin zańsyz dep taný boldy, óıtkeni bilim alý quqyǵy Qazaqstan Respýblıkasy azamattarynyń negizgi konstıtýsıalyq quqyqtarynyń biri retinde qarastyrylǵan.
Sonymen birge, Bilim jáne ǵylym mınıstrliginde orta bilim berý uıymdaryna arnalǵan mindetti mektep formasyna qoıylatyn talaptardy bekitý ókilettigi bar. Mınıstrdiń bul talaptardy bekitetin buıryǵy zańsyz dep tanylmaǵan jáne onyń kúshi joıylǵan joq. Ata-analar osy mektep jarǵysy men mektep formasyna qoıylatyn talaptardy saqtaý mindetin oryndaýǵa jaýapty ekenin eskerýi qajet.
Ata-analardyń balalardy tárbıeleý men bilim berý, olardyń quqyqtary men múddelerin qorǵaý mindetteri zańmen belgilengen. Bul mindetterdi oryndamaý, onyń ishinde Ákimshilik quqyq buzýshylyq týraly kodekste kózdelgen talaptardy saqtamaý jaýapkershilikke ákelýi múmkin.
Joǵarǵy Sottyń sheshimi mektepterde oramal taǵý máselesine qatysty emes ekenin naqty atap ótken jón. Mektepterde mindetti mektep formasyna qoıylatyn talaptar óz kúshinde qala beredi, jáne oqýshylardyń bilim alý quqyǵy men mektep erejelerin saqtaý jaýapkershiligi ata-analarǵa da tıesili.