QR Joǵarǵy Sotynyń 2025 jylǵy 6 naýryzdaǵy qaýlysymen «Azyq-túlik kelisim-shart korporasıasy» UK» AQ uıymdastyrǵan tender qorytyndysy zańsyz dep tanylyp, kompanıaǵa ony qaıta qaraý mindetteldi. İs «Kaspıı» taýar bırjasy» AQ-nyń shaǵymy negizinde qaralǵan.
Daýdyń máni – 2024 jylǵy 24 sáýirde jarıalanǵan tenderde astyqpen bırjalyq saýda-sattyqty uıymdastyrý qyzmetterin satyp alý nátıjesi. Bul tenderde «Kaspıı» bırjasy» AQ-nyń ótinimi qabyldanbaı, jeńimpaz retinde «Eýrazıalyq saýda júıesi» (ESJ) bırjasy tańdalǵan bolatyn. Joǵarǵy Sot atalmysh sheshimde zań talaptarynyń buzylǵanyn, atap aıtqanda ótinimniń resmı emes negizder boıynsha qabyldanbaǵanyn anyqtady.
Sot sheshimi boıynsha Azyq-túlik korporasıasy bir aı ishinde tender nátıjelerin Joǵarǵy Sottyń quqyqtyq ustanymyn eskere otyryp qaıta qaraýy tıis. Sonymen qatar, talapkerdiń paıdasyna memlekettik baj salyǵy da óndirildi.
Aıta keteıik, buǵan deıin sáýir aıynda memlekettik rezervten bıdaı satý ESJ bırjasynda jalǵasyp jatqandyǵy jóninde aqparat taraǵan edi. Bul saýda-sattyq atalǵan sot prosesine sebep bolǵan bolatyn.
Kerek derek
«Kaspıı» taýar bırjasy» AQ – munaı ónimderi, kómir, sement jáne ózge de taýarlarmen saýda jasaýǵa mamandanǵan Qazaqstannyń jetekshi bırjalyq alańy. Bırja EUROPEX – Eýropalyq energetıkalyq bırjalar qaýymdastyǵynyń múshesi, S&P Global reıtıń agenttiginen eń joǵary ESG baǵasyn alǵan, BUU Jahandyq shartynyń tolyqqandy qatysýshysy. Sonymen qatar, KASE qor bırjasynyń resmı lıstıńine engen Qazaqstandaǵy jalǵyz taýar bırjasy bolyp sanalady.