Maýsym aıynyń qorytyndysy boıynsha bul salada baǵa bir aıda 2,6%-ǵa qymbattaǵan.
Baǵanyń eń joǵary jyldyq ósimi Shyǵys Qazaqstan, Qaraǵandy, Qostanaı oblystarynda tirkeldi, dep habarlaıdy Almaty-akshamy.kz Energyprom.kz portalyna silteme jasap.
Ulttyq statısıka búrosynyń málimetinshe, byltyr elde saýalnamaǵa qatysqan úı sharýashylyqtarynyń 90,2%-y jumsaq jıhazǵa ıelik etti. Taǵy 80,6%-ynda jatyn bólme jıhazy, 94,4%-ynda as úı jıhazy, 97%-ynda kilemder bolsa, 3,4%-ynda óner týyndylary, 36,7%-ynda basqa da jıhaz bar.
Qala turǵyndary aýyldyqtarǵa qaraǵanda jumsaq jıhaz, as úı jıhazy, óner zattarymen jaqsy qamtamasyz etilgen. Óz kezeginde aýyl turǵyndarynyń jatyn bólme jıhazy, kilemdermen qamtamasyz etý deńgeıi joǵary.
Óńirlik bóliniste jumsaq jıhazben qamtý kórsetkishi Almatyda joǵary (99,4%), eń tómen kórsetkish – Mańǵystaý oblysynda (53,6%).
Jatyn bólme jıhazymen qamtamasyz etý boıynsha birinshi orynda Almaty oblysy (98,6%) tur, eń tómengi deńgeı Mańǵystaý oblysynda tirkeldi (43,2%).
As úı garnıtýrasymen Almaty, Soltústik Qazaqstan jáne Aqmola oblystarynyń úı sharýashylyqtary 100 paıyzǵa qamtylǵan. Bul kórsetkish Túrkistan oblysynda tómen (86,8%).
Osy jyldyń qańtar-sáýir aıynyń qorytyndysy boıynsha otandyq óndirýshiler as úı jıhazyna degen suranysty (ishki naryqta satý jáne eksport) 64,8%-ǵa qamtamasyz etti. Import – 35,2%. Bul rette sáıkes kezeńde óndiris bir jylda 28,4%-ǵa qysqardy. Otandyq óndiris úlesi jıhaz ımporty óndiriske qaraǵanda aıtarlyqtaı azaıǵandyqtan ǵana ósken.
İshki naryqta 43,3 myń birlik as úı jıhazy satyldy. Bul byltyrǵyǵa qaraǵanda 49,6%-ǵa az. Sektorda eksport is júzinde joq: 4 aı ishinde syrtqy naryqqa 36 birlik ónim jóneltildi.
Bıylǵy maýsym aıynyń qorytyndysy boıynsha jıhaz ben turmystyq zattardyń baǵasy bir aıda 2,6%-ǵa, bir jylda 20,3%-ǵa artty.
Respýblıka boıynsha baǵanyń eń joǵary jyldyq ósimi Shyǵys Qazaqstan (41,8%), Qaraǵandy (33,1%) jáne Qostanaı (31,5%) oblystarynda tirkeldi.
Bul rette baǵanyń eń tómen jyldyq ósimi Mańǵystaý (4,3%), Pavlodar (7,7%) jáne Ulytaý (10,6%) oblystarynda baıqaldy.