Aýyl turǵyndary «Aýyl» partıasyna senedi
Kezekten tys Prezıdent saılaýyna qatysqan kandıdattardyń biri - Jıgýlı Daırabaev naýqannyń aldyn ala qorytyndysynda basym daýys ıelengen Qasym-Jomart Toqaevty jeńisimen quttyqtady. Bul týraly Almaty-akshamy.kz «Habar 24» telearnasyna silteme jasap habarlaıdy.
«Saılaý naýqany óz máresine jetti, aldyn ala qorytyndysy shyqty, halyq óz tańdaýyn jasady. Eń aldymen, maǵan senim bildirip, daýys bergen saılaýshylaryma shyn júrekten alǵysymdy aıtamyn!» - dedi kandıdat.
Ol saıası naýqanda usynǵan baǵdarlamasy osy saılaýmen toqtap qalmaıtynyn atap ótti. Saılaýldy qujatynda kórsetilgen bastamalaryn budan keıin de jalǵastyra beretinine sendirdi.
«Halyqtyń jaǵdaıyn, ál-aýqatyn jaqsartý úshin búkil kúsh-jigerimdi, mańdaı terimdi arnaımyn. Sodan soń, Qasym-Jomart Toqaevty jeńisimen quttyqtaımyn! El ıgiligi úshin eńbek etedi dep kámil senemin! Jańadan saılanǵan Memleket basshysyna el basqarý isinde tabys tileımin!» - dedi Daırabaev.
Jıgýlı Moldahalyquly saılaýaldy kampanıasynda eki basty maqsatqa qol jetkizgenin málimdedi.
«Birinshiden, aýyl jáne aýyl sharýashylyǵynyń qomaqty máselelerin qoǵam aldynda taǵy da kóterdik. Ekinshiden, «Aýyl» partıasynyń jumysyn jan-jaqty nasıhattap, partıanyń múmkindikteri men elektoraldyq kúsh-qýatyn halyqqa tanyta bildik. Aýyl turǵyndary «Aýyl» partıasyna senedi. Biz munymen toqtap qalmaımyz, aýyl men agro salanyń bolashaǵy úshin jumysymyzdy jalǵastyra beremiz! Endi aldaǵy elektoraldyq naýqandarǵa daıyndalamyz!» - dedi Jıgýlı Daırabaev.