Almatyda ótken "Túrki áleminiń medıa keńistigi: jańa dáýirdegi mindetter men múmkindikter" atty VI Halyqaralyq túrkitildes jýrnalıser Medıa forýmynyń paneldik sesıasynda jasandy ıntellekt pen medıa salasynyń damý baǵyttary jan-jaqty talqylandy.
Osy saladaǵy sarapshy maman Meıirjan Áýelhanuly óz sózinde Memleket basshysy keshe ǵana "Jasandy ıntellektini damytý týraly" Zańǵa qol qoıǵanyn atap ótip, bul qujattyń elimizdegi sıfrlyq dáýirdiń jańa kezeńin bastap bergenin jetkizdi. Ol Túrkitildes jýrnalıser qorynyń osy taqyrypty qoǵamda keńinen talqylanbaı turǵan kezeńniń ózinde birneshe jyl boıy semınarlar men forýmdar ótkizip, osy saladaǵy alǵashqy pikirtalastarǵa jol ashqanyn jetkizdi. Jasandy ıntellekttiń búginde jýrnalıser úshin ónimdilikti arttyratyn, málimetterdi jedel taldaıtyn, kontent sapasyn kóteretin qýatty quralǵa aınalǵanyn aıtqan ol jańa tehnologıanyń jańa suraqtar men mindetter týdyratynyn, ásirese etıkalyq normalar, aqparattyq qaýipsizdik, dıpfeıkter máselesi, jýrnalıserdiń kásibı róli sıaqty baǵyttarda ortaq jaýapkershilik qajet ekenine toqtaldy.
Sesıa barysynda sóz alǵan Qanat Esirkepov jasandy ıntellekttiń kontent jasaý prosesindegi praktıkalyq tıimdiligin naqty mysaldarmen túsindirdi. Onyń aıtýynsha, JI jýrnalısiń jumys ónimdiligin 30-40 paıyzǵa deıin arttyryp, redaksıalyq óńdeýge ketetin ýaqytty edáýir qysqartady. JI ásirese derekterge negizdelgen jańalyqtardy, máselen, qarjy esepterin, sport nátıjelerin, aýa raıy málimetterin birden generasıalaı alady. Ol JI-avatarlar arqyly jeke kontentti jappaı óndirý múmkindigin, N8N men MAKE platformalary arqyly redaksıanyń ishki prosesterin tolyq avtomattandyrýǵa bolatynyn kórsetti. Sonymen qatar kásibı medıada keń qoldanylyp jatqan DeepL, Descript, ElevenLabs sıaqty quraldar men faktchekıngke arnalǵan jańa tehnologıalardy tanystyrdy. Spıker JI-diń etıkalyq táýekelderin de nazardan tys qaldyrmaı, jalǵan aqparat pen dıpfeıkterdiń kúrt kóbeıýi medıaǵa degen senimge qaýip tóndiretinin túsindirdi. Sondaı-aq jasandy ıntellekt mamandardy almastyrmaıtynyn, biraq jańa tehnologıany qoldanbaǵan mamandardyń eńbek naryqta básekege qabiletsiz qalýy múmkin ekenin aıtady.
Sonymen birge Madına Mansýrova óz baıandamasynda JI agentteriniń arhıtektýrasyna toqtaldy. Onyń aıtýynsha, Agentic AI qaǵıdaty qabyldaý, josparlaý jáne áreket etý sıkldary arqyly avtonomdy jumys isteıtin júıe atap ótip, JI agentteriniń negizgi kognıtıvtik ıadrosy Úlken tildik model ekenin jetkizdi. Bul oraıda ol jetekshi halyqaralyq tehnokompanıalardyń agentter ekojúıesin jyldam damytyp jatqanyn mysalǵa keltirdi.
2024-2026 jyldarǵa arnalǵan "Qazaq tilin jáne tehnologıalyq progresti qoldaý úshin úlken tildik model qurý" jónindegi nysanaly baǵdarlamany tanystyrǵan sarapshy bul jobanyń qazaq tilindegi zamanaýı JI modelin ázirleýge baǵyttalǵanyn jetkizdi. KazLLM úshin 150 mıllıardtan astam token jınalǵanyn, derekter bazasynda qazaq tilindegi sapaly kontenttiń basymdyǵyn, QazUÝ kitaphanasynyń 8000-nan astam kitaby sıfrlandyrylǵan. Tehnıkalyq turǵyda ReAct arhıtektýrasy, NVIDIA DGX H200 jáne NVIDIA L40 sekildi qýatty ınfraqurylym qoldanylady. Onyń sózinshe, bul jobanyń alǵashqy nátıjeleri kúrdeli tapsyrmalardy, mysaly, gazet materıaldaryn qurylymdyq formatqa avtomatty túrde bólip shyǵýdy júzege asyrýǵa múmkindik berip otyr.
Sesıa barysynda sarapylar jasandy ıntellekttiń medıa salasyna tıgizer yqpalynyń zor ekenin, kontent óndirýshiler úshin jańa múmkindik ashatynyn kórsetti.