Áleýmettik jelide JI arqyly jasalǵan vıdeolar qaptady. Olardyń shynǵa uqsaıtyny sonsha jurttyń úreıin týǵyzyp, úlken býyn tipti senip te qalyp jatyr. Aqshamnews.kz tilshisi mamanmen tildesip, JI jaýlaǵan keleshekten ne kútýge bolatynyn sóz etti.
"JI men shyn vıdeony ajyrata almaıtyn halge jettik"
TikTok-ta jasandy ıntellekt arqyly jasalǵan túrli vıdeolar qaptap ketti. Kópshilik olardyń shyn ne ótirik ekenin ajyra almaı jatqandaryn bólisip jatyr.
Mundaı beınelerden bólek jalǵan sport túrlerimen jarysqa túsip jatqan qazaqstandyqtardyń da vıdeosyn kórgen bolarsyz. "Ydys jýýdan chempıonat", "urysýdan jarys", tipti "nesıe alýdan jarys" degen túrli ataýlarmen deepfake-ter (bul shynaıy emes foto, beıne nemese aýdıo materıal - esk.) tarady.
Qanat Israılov
NOVAHUB GROUP kompanıalar tobynyń negizin qalaýshy, İT mamany
“JI – eki júzdi qylysh: paıdasy men qaýpi qatar júredi”
İT maman Qanat Israılovtyń aıtýynsha, JI vıdeolarynan japa shegý – tehnologıanyń tym jyldam damyp, qoǵamnyń ony qabyldaý qarqynynyń baıaýlaýynan týyndaǵan tabıǵı jaǵdaı.
“JI – eki júzdi qylysh. Bir jaǵynan, ol bıznes, medısına, ǵylym salalarynda úlken serpilis ákeledi. Biraq ekinshi jaǵynan, deepfake vıdeolar áleýmettik turaqtylyqty buzyp, qoǵamdaǵy senimdi azaıtýy múmkin. Eń qaýiptisi – adamdardyń shynaıy men jalǵandy ajyrata almaýy”, – deıdi maman.
Onyń aıtýynsha, bul máseleni sheshý tek tehnologıamen emes, sıfrlyq saýattylyq pen zańnamalyq retteýmen qatar júrýge tıis.
“JI mamandyqty emes, daıyn emes mamandy yǵystyrady”
Jasandy ıntellekt adamdardyń jumysyn tartyp ala ma? Bul - kópshilikti mazalaıtyn suraq. Qanat Israılov bul pikirmen kelispeıdi, biraq mamandyqtardyń sıpaty túbegeıli ózgeretinin aıtady.
“Aldaǵy 3-5 jylda JI qarapaıym tapsyrmalardy oryndaıdy: mátin jazý, kodtyń bir bóligin jazý, qarapaıym dızaın jasaý. Biraq bul joıylý emes, transformasıa. JI-di meńgergen maman ony qoldana almaıtyn 3-4 adamnyń ornyn basa alady. JI mamandardy yǵystyrmaıdy, ony paıdalana bilmeıtinderdi ǵana jumyssyz qaldyrady”, - deıdi ol.
10 jyldan keıin, onyń boljaýynsha, tek adamdyq qasıetterdi talap etetin mamandyqtar óz ornynda qalady: basqarý, psıhologıa, óner, kelissóz júrgizý sıaqty baǵyttar.
Deepfake vıdeony qalaı tanýǵa bolady?
Jelini toltyrǵan jalǵan vıdeolardan qorǵanýdyń eń tıimdi joly – saq bolý jáne aqparatty tekserý.
Qanat Israılov Deepfake-ti anyqtaýdyń úsh qarapaıym tásilin usynady:
-
Bet pen kóz qozǵalysyna nazar aýdaryńyz.
Kózdiń jypylyqtaýy, erinniń dybyspen sáıkestigi – eń jıi qatelesetin tustar. -
Jaryq pen fon sáıkestigine mán berińiz.
Eger adam men artqy fonnyń jaryǵy bir-birine sáıkes kelmese, vıdeo jasandy bolýy yqtımal. -
Emosıaǵa berilmeńiz.
Kez kelgen beıne sizdi ashýlandyryp, qorqytyp nemese qýantsa, bir sát toqtap, “bul ras pa?” degen suraq qoıyńyz.
“Deepfake-tiń eń úlken qarýy – emosıa. Emosıaǵa berilmeseńiz, sizdi aldaý qıyn”, – deıdi maman.