Almatyda qūrylys sapasyn arttyru jáne tūrǵyndardyń qūqyqtaryn qorǵau boıynsha jūmys kúsheıíp jatyr.
Būl turaly qala ákímíníń orynbasary Beıbít Shahanov Óńírlík kommunıkatsıyalar qyzmetínde ótken brıfıngte aıtty, - dep habarlaıdy Aqshamnews.kz.
Onyń aıtuynsha, ákímdíktíń basty míndetí – qūrylys salasynda tártíp ornatu jáne zań būzushylyqtarǵa jol bermeu. Ásírese úlestík qatysu arqyly tūrǵyn úı salu baǵyty erekshe baqylauda.
«Bíz qūrylys kompanıyalarynyń jūmysyn tūraqty túrde tekseremíz. Qūrylystyń sapasy, merzímí jáne kelísímshart talaptarynyń oryndaluy qatań baqylanady. Eger zań būzylsa, eskertu jasaımyz, aıyppūl salamyz nemese qajet bolsa, jūmysty toqtatamyz», – dedí qala ákímíníń orynbasary.
Joba bastalar aldynda barlyq rūqsat qūjattary men qarjylyq kepíldíkter tekseríledí. Būl bolashaq úleskerlerdíń qauípsízdígín qamtamasyz etedí.
Qala ákímdígí tūrǵyndarǵa senímdí qūrylys kompanıyalaryn tańdauǵa kómektesu úshín ashyq aqparattyq tízím júrgízedí jáne ony únemí jańartyp otyrady.
Memlekettík tapsyryspen jūmys ísteıtín qūrylysshylardyń da jauapkershílígí kúsheıtíldí.
«Keıbír merdígerler óz míndetterín dūrys oryndamaıdy. Sonyń kesírínen mektepter men balabaqshalardyń qūrylysy keshígedí. Bíz mūndaı jaǵdaılarǵa jol bermeımíz», – dedí spıker.
Bıyl ekí kompanıya – «SK 7 Stroı» JShS jáne «AsiaMax» JShS lıtsenzıyasynan aıyryldy. «SK MEGARON» JShS boıynsha tekseru júrgízílíp jatyr. Sondaı-aq «Qūrylysshy-TBS» JShS lıtsenzıyasynyń bír bólígí toqtatylyp, «Alatau sapa qūrylys» JShS tehnıkalyq qadaǵalau qūqyǵynan aıyryldy.
Beıbít Shahanov atap ótkendeı, maqsat – qūrylys salasynda ádíldík ornatyp, qala tūrǵyndarynyń múddesín qorǵau.