Cport seksıalaryna 6 myńǵa jýyq balany jalǵan resimdegen
ArtSport baǵdarlamasyn júzege asyrý barysyn tekserý kezinde 6 myńǵa jýyq balany jalǵan tirkegeni anyqtaldy. Saldarynan 1,1 mlrd teńge búdjet qarjysy jymqyrylǵan, dep habarlaıdy Almaty-akshamy.kz QR Bas prokýratýrasynyń baspasóz qyzmetine silteme jasap.
«Tekserý barysynda úıirmeler men sport seksıalaryna 6 myńǵa jýyq balany jalǵan resimdeý arqyly 1,1 mlrd teńge búdjet qarjysynyń urlanǵany anyqtaldy. Keı óńirde (Almaty, BQO, SHQO, Mańǵystaý oblysy) balalarmen bilim-biligi joq, shyǵarmashylyq pen sportqa múldem qatyssyz, tipti buryn jezókshelik jáne jynystyq qolsuǵýshylyq qylmysy úshin sottalǵandar jumys istegen. Al basqa oblystarda úıirme jáne seksıa zaldary sanıtarlyq talaptarǵa sáıkes kelmegen», - delingen habarlamada.
Sondaı-aq, resmı aqparatta memlekettik shyǵarmashylyq jáne sporttyq tapsyrystardy jarıalaý erejesi «Atameken» ulttyq kásipkerler palatasymen kelisilmegeni aıtylǵan.
Tapsyrys aıasynda sybaılas jemqorlyqqa qarsy bir de bir qorytyndy alynbaǵan.
«Prokýrorlardyń alaıaqtyq, urlyq, para berý jáne para alýdy anyqtaǵan faktileri boıynsha (18 is) sotqa deıingi tergep-tekserý amaly bastaldy. 16 laýazymdy tulǵa tártiptik jaýapkershilikke tartyldy, sol sıaqty 94 bıznes sýbektisiniń quqyǵy qorǵalyp, 50 jaldaý sharty buzyldy», - deıdi vedomstvodan.
Joǵarydaǵy jaıtqa baılanysty Bas prokýratýra ArtSport baǵdarlamasy sharttaryna ózgeris engizilgenin habarlaıdy.
Iaǵnı vaýcher sany bireýge deıin qysqardy (buryn 2 balaǵa deıin jazylý múmkin edi), sonymen qatar sanıtarlyq talaptar kúsheıtilip, eń tómengi jas shegi ózgertildi (buryn erkin kúreske qabyldaý 5 jastan bastalsa, qazir 10 jastan).