Jez qanat, kúmis baýyr kıik kórdim
Dárýi sol ma dersiń kúıik-sherdiń
Jez maral júredi eken arasynda
Qaptaǵan Betpaqtaǵy kıikterdiń
Jez kıik, bizdiń jaqqa qalaı keldin?
Jolymdy tike kesip, janaı berdiń
Adamnyń kózderindeı eki kóziń
Iapyrmaı, dátim shydap qalaı kórdim?
Dál saǵan qurmap edi tordy eshkim
Ǵaıyptan dýshar boldyń, sordy keshtiń
Men-daǵy sertshil adam dalady ósken
Sen-daǵy jaltarmadyń, joldy kestiń
Asyqpa, kóreıinshi jóndep qana
Ketpesin jańa tıgen mendep jara
Et kesip óz etimnen bersem -daǵy
Jónińe jibereıin emdep qana
Dedim de qoıa berdim, ustamadym
Qasymda qal demedim, qystamadym
Tileımin sýyq jaqtan esen qaıtyp
Jylyqum mekenine qystaǵanyn
Tús terbep, jazdyń móldir qysqa tańy
Tuzaqtap jez kıikti ustatamyn
Baıaǵy qyzyl ishik kıgen qyzǵa
Jez kamzol sol kıikti uqsatamyn
Qumarym qaıta kórip qanar ma eken?
Ál bitip, salqyn júrek janar ma eken?
Bolmasa, sýyq qoldy bir sur mergen
Dál kózdep álde atyp alar ma eken?
Sulýdy adam jany qımaıdy eken
Beımezgil eske túsip qınaıdy eken
Jez kıik, seni ańsaǵan kezderimde
Bir ózim keń dalaǵa symaı ketem.
K.Salyqov
