Jetisý oblysy Qapal aýylynyń turǵyny Nurjanat Erdáýletqyzy erekshe ónim shyǵaryp otyr. Ol sút ónimderi men baldan sabyn ázirleýdi qolǵa alǵan. Kásipker ózi taýaryn «jasyl ónim» dep ataıdy. Sebebi ondaǵy qospalar taza, tabıǵı, - dep habarlaıdy Almaty-akshamy.kz Jetisý oblysy ákiminiń baspasóz qyzmetine silteme jasap.
Atajurtqa Qytaıdan 2019 jyly kóship kelgen Nurjanat Erdáýletqyzy kezinde kásibin alabota shóbinen qara sabyn qaınatyp bastaǵanyn aıtady. Keıin suranysqa qaraı shyǵaratyn ónim túrin kóbeıtken. Sonyń ishinde sút sabyny, aıran sabyny, saýmal sabyny, qıar jáne bal sabyndary sıaqty túrlerin daıyndaıtyn boldy. Negizi bul kásippen aınalysýdy Qytaıda júrgende bastaǵan. Keıin elgen kelgen soń isin qaıta jandandyrdy. Oǵan otaǵasynyń attan qulap, mertigip, jumysqa shyǵa almaı qalǵany túrtki bolypty. Iaǵnı osy kásipti júrgizip, tabys tabýǵa bel baılaǵan.
- Sabyndy daıyndaýǵa ózimizdiń saýmal, sút, qatyǵymyz, kókónisimiz, Tekeliniń baly qoldanylady. Al qajetti kokos maıyn Qytaıdan alǵyzamyn. Kásipti keńeıtýge memleket tarapynan beriletin grantqa talpynyp kórýge nıettimin. Qazir otbasym barynsha qoldaý kórsetip otyr. Eki balam men kelinim ónimdi qorapqa salyp qaptaýǵa, áleýmettik jeliler arqyly taýar ótkizý isin ilgeriletýge járdemin tıgizedi, - deıdi N.Erdáýletqyzy.
Onyń aıtýynsha, kishkene balalar úshin sabyn júrek, gúl, mysyq jáne basqa da qyzyqty ári tartymdy formalarda quıylyp daıyndalady. Mundaı sabynmen nárestelerdi shomyldyrsa, eshqandaı alergıa bolmaıdy. Eresekter qoldansa, bettiń terisin jumsartady, jańa túsken ájimderdi, maıly bettiń bóritkenderin, qara daqtardy ketirýge kómektesedi. Iaǵnı kishigirim kosmetıkalyq ónim deýge bolady. Baǵasy sabynnyń kólemi men quramyna qaraı 500 teńgeden bastalady. Degenmen kásipker bettegi daqtardy medısınalyq jaǵynan teksertýdi umytpaý kerek deıdi. Sebebi ol adamnyń ishki aǵzalarynyń syrqaty saldarynan ba, álde syrtqy áserlerden be, aldymen sony anyqtap alǵan jón.