Jalpy oblys boıynsha ákim bolýǵa 279 adam nıetti.
Almaty oblysynda aýyldyq okrýg ákimderiniń saılaýyna saıası partıalardan jáne ózin-ózi usyný arqyly 279 úmitker usynylǵan. Ortasha básekelestik deńgeıi 3,9 adamnan keledi, dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Usynylǵan 279 úmitkerdiń 249-y - er, 30-y - áıel azamatshalar.Úmitkerlerdiń ortasha jasy - 41,3 jas.
Oblystyq aýmaqtyq saılaý komısıasynyń múshesi Qaharman Jaqsylyqtyń sózine súıensek, jalpy, Almaty oblysynda 71 aýyldyq okrýgte ákimder saılaýy ótedi. Bul rette 60 ákim ókilettik merziminiń aıaqtalýyna baılanysty, 11-i ókilettikterin merziminen buryn toqtatýǵa baılanysty saılanady. Óz kandıdattaryn usynǵan saıası partıalar qatarynda Nur Otan partıasy, «Aýyl» HDPP, «Aq Jol» QDP, «ADAL» SP, QHP, JSDP bar.
«Usynylǵandar arasynda 154 úmitker - jumys istep júrgen memlekettik qyzmetshiler, 32-si - komersıalyq qurylymdardyń ókilderi, 70-i - búdjettik uıymdardyń qyzmetkerleri, 10-y ýaqytsha jumys istemeıdi, 3-eýi - qoǵamdyq birlestikterdiń ókilderi, 6-ýy - ózin-ózi jumyspen qamtyǵandar, 3-eýi - ishki ister jáne áskerı salalardyń zeınetkerleri. Arasynda ǵylymı dárejesi bar kandıdat ta bar», - dedi Qaharman Jaqsylyq.
Bıylǵy jylǵy 10 shildedegi derek boıynsha, 159 úmitker tirkelgen (56,6%).Túrli sebepter boıynsha 23 úmitker alynyp tastaldy, onyń 16-sy talaptarǵa sáıkes kelmeıdi, 7-eýi óz kandıdatýrasyn alyp tastaý týraly ótinishterine sáıkes shyǵaryldy.