Jetisý oblystyq polısıa departamentiniń esirtki qylmysyna qarsy is-qımyl basqarmasy, prokýratýra ókilderimen birlesip, "Qarasora" jedel-profılaktıkalyq is-sharasy barysynda esirtki tasymaldaýdyń iri arnasyn toqtatty.
Tergeý kezinde Almaty qalasynan Jetisý oblysyna esirtki jetkizip, saqtaýmen aınalysqan azamattyń áreketi áshkerelendi. Jedel-izdestirý is-sharalary nátıjesinde Almaty oblysynyń Shamalǵan aýylynda 51 jastaǵy er adam ustaldy, - dep habarlaıdy Aqshamnews.kz.
Keıinnen kúdiktiniń turǵylyqty jerinde jáne Jambyl oblysy Merki aýdanyndaǵy mal sharýashylyǵy qoımasynda tintý júrgizilip, erekshe ıisi bar, qarasoraǵa uqsas ósimdik tektes zat tabyldy. Saraptama qorytyndysyna sáıkes, bul keptirilgen marıhýana bolyp shyqty. Onyń jalpy salmaǵy 10 keliden asty.
Quqyq qorǵaýshylardyń aıtýynsha, munshama kólemdegi esirtki 10 myńnan astam adamdy tyıym salynǵan zattardy tutynýǵa ıtermeleýi múmkin edi. Alaıda polısıanyń jedel ári úılesimdi jumysynyń arqasynda qaýipti ónimniń zańsyz aınalymǵa túsýine jol berilmedi.
Qazirgi ýaqytta kúdikti qamaýǵa alynyp, tergeý amaldary júrgizilýde.
Eske sala keteıik, qoldanystaǵy zańnamaǵa sáıkes, esirtki quraldaryn, psıhotroptyq zattardy nemese olardyń analogtaryn zańsyz satyp alý, saqtaý, tasymaldaý, ótkizý nemese jóneltý aýyr qylmys sanalady. Ol úshin múlikti tárkileı otyryp, jeti jyldan on eki jylǵa deıin bas bostandyǵynan aıyrý jazasy qarastyrylǵan.