Jabyq baseınniń jalpy kólemi 3644,20 sharshy metrdi quraıdy.
İ.Jansúgirov atyndaǵy Jetisý ýnıversıtetiniń stýdentteri endi óz baseınderinde júzip úırenetin bolady. Jańa gıdrotehnologıalyq nysan ýnıversıtet qarjysyna salyndy, dep habarlaıdy Almaty-akshamy.kz.
«Jaqynda Taldyqorǵan qalasynda olımpıadalyq úlgidegi jabyq baseın ashylǵan edi. Jattyǵýǵa 3 myńnan asa bala jazylyp, myńnan astamy júzý úıirmesinde daıyndalýda. Jattyqtyrýshylar quramyn keńeıtý jaǵy qarastyrylýda. Elbasy tapsyrmasy aıasynda aımaqta 13 dene shynyqtyrý-saýyqtyrý kesheni qoldanýǵa berildi. Taǵy tórteýiniń jáne 150 vorkaýt-nysannyń qurylysy júrgizilýde. Búgin, mine, stýdentterge arnalǵan júzý baseıni paıdalanýǵa berildi. Baseın buqaralyq sportty damytý jáne salaýatty ómir saltyn nasıhattaý maqsatynda salyndy», - dep atap ótti Almaty oblysy ákiminiń orynbasary Batyrjan Baıjumanov.
Ol ýnıversıtet basshylyǵyna oqý sapasynyń joǵarylyǵy, oqý ǵımaratynyń materıaldyq-tehnıkalyq bazasynyń jańartý baǵytyndaǵy jumystary úshin alǵysyn bildirdi.
Batyrjan Baıjumanov, sondaı-aq, búginde ýnıversıtet qabyrǵasynda 6 myńnan astam stýdent bilim alyp jatqanyn jetkizdi. Onyń 450-i - oblys ákimi grantynyń ıegeri.
Óz kezeginde ýnıversıtet rektory Qýat Baımyrzaev oblys ákiminiń qoldaýynyń arqasynda salynǵan stýdentterge arnalǵan zamanaýı jataqhananyń arqasynda Jetisý ýnıversıteti respýblıka boıynsha stýdentterdi áleýmettik qamtý boıynsha birinshi oryn ıelengenin aıtty. Sondaı-aq ol oblys ákimine ýnıversıtetke kórsetilip jatqan kómek úshin alǵysyn bildirdi.
Stýdentter atynan sóz alǵan dene shynyqtyrý jáne sport fakúltetiniń 4-kýrs stýdenti, kórkem gımnastıkadan sport sheberi Dıana Beısenova rızashylyǵyn jetkizip, baseınniń ashylýy stýdentterdiń sportqa den qoıýyna serpin beretinin jetkizdi.
«Jabyq baseınniń jalpy kólemi 3644,20 sharshy metrdi quraıdy. Nysan qurylys talaptaryna jáne sanıtarlyq-epıdemıologıalyq standarttarǵa saı salynǵan. Baısseınge kiretin jeke kire beris, kıim aýystyratyn oryn, saýna, vana, jattyqtyrýshy men jumysshylarǵa arnalǵan bólme, sport ınventaryn tazalap, saqtaýǵa arnalǵan arnaıy bólme, dezınfeksıalyq zattar barlyǵymen qamtylǵan. Ákimshilik jáne medısınalyq kabınetter de bar. Odan bólek sýdy testileýden ótkizýge arnalǵan zerthanamen qamtylǵan», – delingen Almaty oblysy ákimdiginiń baspasóz qyzmetiniń habarlamasynda.
Nysan qurylysy byltyr bastalǵan. Ashylǵan boıda ýnıversıtet qyzmetkerleri men stýdentteri arnaıy bekitilgen keste boıynsha baseınge kelip, jattyǵa alady.