Sheteldik kólikterdi tirkeýge qoıý merzimi 2022 jyldyń 1 naýryzyna deıin uzartyldy.
Almaty oblysynyń 37 turǵyny Armenıadan ákelgen kólikterin zańdastyryp alǵan. Polısıa mamandary mundaı kóligi bar azamattardy tirkeýden jyldam ótýge shaqyrdy, dep habarlaıdy Almaty-akshamy.kz.
İshki ister mınıstrliginiń resmı saıtyndaǵy málimetter boıynsha, sheteldik kólikterdi zańdastyrýdyń biregeı múmkindigin elimizdiń kóptegen azamaty paıdalanǵan.
«Qazaqstan Respýblıkasy Úkimetiniń 2021 jylǵy 27 aqpandaǵy qaýlysyna sáıkes, elimizge Armenıadan ákelingen kólikterdi tirkeýge qoıý merzimi 2022 jylǵy 1 naýryzǵa deıingi merzimge uzartyldy. Sheteldik tirkeýdegi kóligi bar turǵyndardan osy múmkindikti jibermeı, tirkeýge tezirek qoıýǵa shaqyramyn», – dedi Almaty oblysy PD ÁPB Prosesıng ortalyǵynyń aǵa ınspektory Erjan Jantileýov.
Esterińizge sala keteıik, Memleket basshysynyń tapsyrmasyna sáıkes, byltyr QR Úkimeti Armenıa elinen ákelingen kólikterdi tirkeýge qoıý tártibi men merzimin bekitken bolatyn. Degenmen jahandy jaılaǵan koronavırýs indetine, memlekettik shekaralardyń jabylýyna, kólikterdi synaqtan ótkizý mekemelerdiń jumysyndaǵy ózgeristerge baılanysty ýaqytsha tirkeýge qoıý ýaqytyna ózgertýler engizilip, uzartylǵan bolatyn.