Bul hab 1500 adamǵa jumys beredi.
Almaty oblysynda A+ klasty avtomattandyrylǵan, alańy 200 myń sharshy metr bolatyn Qazaqstandaǵy iri logıstıkalyq hab salynady. Sonyń nátıjesinde oblysqa 200 mln AQSH dollary kóleminde ınvestısıa tartylyp, 1,5 myń jumys orny ashylady, dep habarlaıdy Almaty-akshamy.kz.
Almaty oblysy ákiminiń baspasóz qyzmetiniń habarlaýynsha, oblys ákimi Qanat Bozymbaev pen «AIRBA FF» JSHS Dırektorlar keńesiniń tóraǵasy, «Tehnodom» kompanıasynyń negizin salýshy Edýard Kım osyndaı memorandýmǵa qol qoıdy.
Kezdesýde Qanat Bozymbaev osy iri ınvestısıalyq jobany iske asyrý óńirdiń logıstıkalyq áleýetin damytyp qana qoımaı, tutastaı alǵanda oblys ekonomıkasyna mýltıplıkatıvti nátıje beretinine atap ótti.
«Bul - buryn Almaty oblysynda bolmaǵan óte tartymdy ári mańyzdy joba. Zamanaýı sıfrlyq tehnologıalardy qoldaný ereksheligin eskersek, naǵyz jańa dáýirge laıyq deýge bolady. Birinshiden, bizdiń agrarlyq saladaǵy sharýashylyqtarymyzdyń óz ónimin ótkizýine jaǵdaı jasaıdy. Elimizdiń agroónerkásiptik keshenindegi ónim kóleminiń 28-30%-in Almaty oblysy óndiretinin eskersek, bul - biz úshin úlken múmkindik. Ekinshiden, shaǵyn jáne orta bıznesti qarjylaı qoldaýǵa jańa múmkindikter ashady. Sonymen qatar ınvestor kompanıa Taldyqorǵan qalasyndaǵy kolejderdiń biriniń bazasynda İT mamandar daıyndaıtyn oqý ortalyǵyn ashady. Bul sıfrlyq mashyqtaryn jetildirip, dýaldi oqytýdy damytýǵa yqpal etedi. Árıne, óńir ekonomıkasy úshin salyq túsimderi de mańyzdy. Degenmen biz úshin halyqtyń múddesi aldyńǵy orynda. Keshen 1500 adamǵa jumys beredi. Nysan ornalasatyn İle aýdanynda 300 myńnan astam adam turady, al oblystaǵy halyq sany 2 mln 200-ge jetti. Logıstıkalyq keshen jańa jumys oryndarynyń ashylýyna, zamanaýı tehnologıalar men qarjylaı qoldaý quraldary aıasynyń keńeıýine jaǵdaı jasaıdy. Jobaǵa barlyq kezeńinde barynsha qoldaý kórsetetin bolamyz», - dedi QanatBozymbaev.
Qol jetkizilgen kelisimge sáıkes, mańyzdy ınvestısıalyq joba aldaǵy 5 jylda birneshe kezeńmen iske asyrylady.
Keshen İle aýdanynda ornalaspaq.
Óziniń negizgi fýnksıasymen qatar nysan klıentter tartý men ónimderdi ornalastyrýǵa arnalǵan «Airba Marketplace» onlaın-sóresin paıdalanýǵa jaǵdaı týǵyzady. Sol sıaqty «Airba Fintech» onlaın-platformasynyń múmkindikterin paıdalana otyryp, aýyl sharýashylyǵy taýar óndirýshileri jeńildikpen qarjylandyrý men aınalym qarjysyn tolyqtyrýǵa qol jetkize alady, óz taýarlaryn deldaldardyń qatysýynsyz iri saýda jelilerinde satý jónindegi kelisimsharttar jasasa alady, al jas mamandar turǵyn úı satyp alýǵa nemese baspana jaǵdaıyn jaqsartýǵa qoljetimdi ıpoteka ala alady. Bul qyzmetterge júginý úshin qarjy ınstıtýttaryna barýdyń, málimetterdi qaǵaz júzinde aparýdyń qajeti joq, qyzmetter onlaın-rejımde kórsetiledi.