Jetisý komandasy eki ret «Aıbyn» respýblıkalyq áskerı-patrıottyq jastar jıynynyń jeńimpazy atandy
«Jas sarbaz – Qazaqstannyń tiregi» forýmynda «Jas sarbaz» respýblıkalyq áskerı-patrıottyq qozǵalysynyń jyldyq qyzmetiniń qorytyndysy shyǵaryldy, dep habarlaıdy Almaty-akshamy.kz.
Atalǵan sharaǵa Qorǵanys mınıstrligi Tárbıe jáne ıdeologıalyq jumystar departamentiniń bastyǵy general-maıor Serik Borambaev, Jetisý oblysy ishki saıasat basqarmasynyń basshysy Bolat Kerimbek, Ulttyq áskerı-patrıottyq ortalyqtyń bastyǵy Arman Asenov, «Jas sarbaz» respýblıkalyq áskerı-patrıottyq qozǵalysynyń tóraǵasy Meıirbek Meńdiǵalıev, Qarýly kúshterdiń ardagerleri, qoǵam qaıratkerleri, joǵary áskerı oqý oryndarynyń kýrsanttary men oqýshylar qatysty.
«Qarýly kúshter qyzmetiniń mańyzdy baǵyttarynyń biri. Elimizde jumys istep jatqan «Jas sarbaz» respýblıkalyq áskerı-patrıottyq qozǵalysy jas azamattardyń talantyn ashýǵa, áskerı qyzmet pen jaýyngerlik mamandyqqa degen qyzyǵýshylyǵyn arttyrýǵa yqpal etedi», – dedi general-maıor Serik Borambaev.
Forýmda oqýshylar men kýrsanttar «Jas sarbaz» qozǵalysy, óz jobalary men josparlary týraly aıtyp berdi. Jetisý oblysy Alakól aýdany «Jas sarbaz» áskerı-patrıottyq qozǵalysy bóliminiń tóraǵasy Tilek Qabylqanov óńirdegi balalar men jasóspirimder týrızmin damytýǵa baǵyttalǵan «Patriot» jobasyn tanystyrdy.
Aǵaıyndy Malıka men Mádına Janaıdarovalar úshin qazaqtyń batyr qyzdary Álıa Moldaǵulova, Mánshúk Mámetova jáne Hıýaz Dospanova úlgi tutar qaharmandar. 2021-2022 jyldary olar «Aıbyn» respýblıkalyq áskerı-patrıottyq jastar jıynynda júldeli oryndarǵa ıe boldy. Búginde qyzdar óz ómirin Qarýly kúshtermen baılanystyrýdy josparlap otyr.
«Jas sarbaz» qozǵalysynyń tárbıelenýshileri Jaıyq Jumaǵazy men Nurasyl Sháripov te jetistikterge jetti. Olar bedeldi halyqaralyq baıqaýlar men jarystardyń jeńimpaz, júldegeri atandy.
«Jas sarbaz» qozǵalysynyń úıirmelerindegi sabaqtar kóptegen balalarǵa bolashaqtaǵy mamandyǵy týraly sheshim qabyldaýǵa aıtarlyqtaı áser etýde. «Aıbyn-2022» respýblıkalyq jastar jıynynyń absolútti jeńimpazy Sultan Serikuly Radıoelektronıka jáne baılanys áskerı-ınjenerlik ınstıtýtynyń kýrsanty atandy.
Aıta ketý kerek, «Jas sarbaz» áskerı-patrıottyq qozǵalysynyń birinshi fılıaly osy óńirde ashylǵan bolatyn. Jetisý komandasy eki ret «Aıbyn» respýblıkalyq áskerı-patrıottyq jastar jıynynyń jeńimpazy atandy. Bıyl «Jetisý tarlandary» áskerı-patrıottyq klýbynyń komandasy bas júldeni jeńip aldy.
2022 jyly jastarǵa áskerı-patrıottyq tárbıe berý salasyndaǵy qyzmettiń qorytyndysy boıynsha aýyspaly «Patrıottar mekeni» kýbogy jetisýlyqtarǵa buıyrdy. Kýbokty Túrkistan oblysynyń ókilderi tapsyrdy. Aýyspaly marapattyń burynǵy ıegerleri jańa jeńimpazdardy quttyqtap, olarǵa aýqymdy jobalar men jastardy áskerı-patrıottyq tárbıeleý isinde sáttilik tiledi.