Jetisý aýdanynda azamattarǵa tıimdi de turaqty áleýmettik qoldaý kórsetý boıynsha júıeli jumys istelip jatyr. Bul baǵyttaǵy negizgi sharýa – otbasylyq ınstıtýtty nyǵaıtý, ómir sapasyn arttyryp, halyqtyń áleýmettik osal toptaryn qoldaý bolyp qalyp otyr.
Jumystyń basty keńsesi – Jansúgirov kóshesi, 65 mekenjaıynda ornalasqan «Baqytty otbasy» Otbasyn qoldaý ortalyǵy. Aýdan ákimi Lázzat Jylqybaeva Óńirlik komýnıkasıalar qyzmetimen birlesip uıymdastyrylǵan pres-týr barysynda ortalyqtyń jumysy týraly aıtty.
2025 jyldyń qańtarynda ortalyqta kúrdeli jóndeý jumysy aıaqtalyp, jańa qural-jabdyqtarmen qamtamasyz etilgen, turǵyndarǵa qajetti qyzmetti kórsetý úshin barlyq jaǵdaı jasalypty.
«Ortalyq júzdegen otbasy úshin senimdi tirekke aınaldy. Munda ómirdegi mańyzdy máseleler boıynsha keshendi kómek kórsetý – keńesten bastap qıyn jaǵdaıda súıemeldeý jaǵy da eskerilgen. Qazir ortalyqta 475 adam tirkelgen, olarǵa 4370-ten astam áleýmettik, psıhologıalyq, quqyqtyq qyzmet kórsetildi», – deıdi Lázzat Jylqybaeva.
«Baqytty otbasy» ortalyǵynyń negizgi baǵyty:
• otbasylyq qatynastar men bala tárbıesi boıynsha keńes berý;
• daǵdarysta psıhologıalyq qoldaý kórsetý;
• jumyspen qamtyp, áleýmettik beıimdelýge járdemdesý;
• quqyqtyq kómek pen aǵartý jumysy;
• kópbalaly jáne az qamtylǵan otbasylarǵa qoldaý kórsetý.
Ortalyqta trenıńter, otbasylyq klýbtar, dárister men jeke keńester uıymdastyrylyp, ár adamnyń ózin senimdi, qaýipsiz sezinýine kómektesedi. «Baqytty otbasy» – bul jaı ǵana mekeme emes, bul – senim men qoldaý.
Zeınetkerlerge keń aýqymdy qyzmet kórsetetin Belsendi uzaq ómir súrý ortalyqtarynyń jumysyna da erekshe nazar aýdarylǵan.
«Bizde jumys qyzyp jatyr. Kúnine jospar boıynsha 100 adamdy qabyldaımyz, biraq keıde odan da kóp adam keledi. Ortalyqtyń baǵyttary ártúrli, ásirese skandınavıalyq júris, psıhologıalyq qoldaý men emosıalyq ıntellekti damytýǵa arnalǵan sabaqtar tanymal. Qarttarǵa jaıly jaǵdaıdyń bolǵany asa mańyzdy. Adamdar sabaqqa qýana qatysyp, kún saıyn alǵys aıtady, bul bizge shabyt beredi. Osyndaı jobalar qalanyń ár aýdanynda iske asyrylýy qajet dep oılaımyn», – dep atap ótti Aınabulaq shaǵyn aýdanyndaǵy Belsendi uzaq ómir súrý ortalyǵynyń jetekshisi Botagóz Qudysheva.
Jetisý aýdanynda tabysty jumys istep jatqan basqa da ortalyqtar:
• «Ten Qogam» ortalyǵy – múmkindigi shekteýli azamattarǵa mamandardyń kómegin, kýrstar men kásibı baǵdar berý qyzmetin usynady. Búginge deıin 130 adamǵa 304 túrli qyzmet kórsetken.
• «Shyńǵa órleý» klýby – 137 balaǵa til, matematıka, IT salalary boıynsha bilim berip, shyǵarmashylyq úıirmeler usynady.
• Aınabulaq pen Kemeldegi belsendi uzaq ómir súrý ortalyqtary –
• 318 zeınetkerge 4800-den astam qyzmet kórsetip, ıoga, aıkýne, qolóner, horeografıa, kompúterlik saýattylyq, til úıretý sekildi baǵyttardy qamtyǵan.
Jetisý aýdanynyń ákimdigi otbasylarǵa, balalarǵa, qarttar men erekshe qajettiligi bar azamattarǵa qoljetimdi qyzmetterdi damytyp, áleýmettik qorǵaý júıesin nyǵaıtý jumystaryn odan ary jalǵastyra túspek.