Bas prokýratýra Bolat Nazarbaevtyń uly Nurbol Nazarbaevtyń elden zańsyz shyǵarǵan aktıvterin tekseredi, - dep habarlaıdy aqshamnews.kz tilshisi.
Bul týraly depýtat Rınat Zaıyttyń depýtattyq saýalyna jaýap bergen Bas prokýror Berik Asylov málim etti.
Rınat Zaıyt óz saýalynda Nurbol Nazarbaevtan osy ýaqytqa deıin biraz aktıv qaıtarylǵanyn aıtqan edi.
"Bolat Nazarbaevtyń uly Nurbol Nazarbaev sot sheshimimen 57 mıllıard teńge kólemindegi aktıvinen aıyrylyp, memleket menshigine qaıtaryldy. Sonymen birge, oǵan 925 mıllıon teńge aıyppul jáne 230,4 mıllıon teńge aıypaqy salyndy. Eń bastysy, onyń barlyq bank shottary buǵattalyp, kompanıa kirisin jáne jeke múlkin basqarý quqyǵynan aıyryldy. Bul áýlettiń reıderlik jolmen ıelengen bazarlary, sondaı-aq, Almaty qalasy men oblysynda zańsyz alǵan jer telimderi týraly qoǵamda túrli derekter aıtylyp júr. Ásirese atyshýly "Altyn orda" bazaryna qatysy jıi sóz bolady. Alaıda atalǵan nysandardyń joǵaryda tárkilengen aktıvterdiń qatarynda bar-joǵy ázirge belgisiz. Sebebi bul máselelerdiń naqty jaıjapsary ashyq túrde jarıalanbaǵan", - degen Zaıyt Bas prokýrorǵa birneshe saýal qoıǵan edi.
Sonyń ishinde,
- Nurbol Nazarbaevtyń ıeligindegi kompanıalar men aktıvterge túgendeme júrgizip, onyń zańdylyǵyn anyqtaý, zańsyzdaryn memleket menshigine qaıtarý;
- Atalǵan qaıtarylǵan zańsyz aktıvter jáne olardyń paıdalanylýy boıynsha tolyq aqparatty jurtshylyqqa qoljetimdi etý;
- "Altyn orda" bazary jáne Almaty qalasy men oblysyndaǵy zańsyz ıelengen jer telimderi boıynsha tergeýdi bastaý.
Bul depýtattyq saýalǵa jaýap bergen Berik Asylov jalpy, elge qaıtarylǵan aktıvter týraly esep bergen.
"Zańsyz ıemdelgen aktıvterdi memleketke qaıtarý máseleleri jónindegi komısıanyń (budan ári - Komısıa) sheshimi boıynsha búgingi kúni 1,3 trln teńge kóleminde sharalar qabyldandy. Zań sýbektilerimen jasalǵan kelisimderge sáıkes memleket paıdasyna erikti túrde shamamen 750 mlrd teńge qarajat aýdarylyp, 103 mlrd teńgege múlik zattaı túrde tapsyryldy. Qaıtarylǵan qarajat esebinen 400-den astam áleýmettik nysannyń qurylysy bastaldy, onyń ishinde 220 sýmen jabdyqtaý jáne komýnaldyq ınfraqurylym nysany, 177 medısınalyq mekeme, 14 bilim berý jáne sport nysandary bar. 68 nysannyń qurylysy aıaqtaldy (densaýlyq saqtaý salasynda – 64, sýmen jabdyqtaý – 3 jáne sport – 1). Budan bólek, Zań sýbektilerimen jasalǵan kelisimder negizinde olar óz betinshe sáıkesinshe 5,2 trln teńgege jáne 121 mlrd teńgege ınvestısıalyq jáne áleýmettik jobalardy iske asyrýdy bastady. Atalǵan jobalar ulttyq ekonomıkanyń ornyqty damýyna jáne azamattardyń ómir súrý sapasyn arttyrýǵa baǵyttalǵan", - dep jaýap bergen Asylov.
Onyń sózine sensek, Nurbol Nazarbaevtyń aktıvteri Qazaqstanǵa kúshtep qaıtarylǵan 112 mlrd teńgeniń ishinde bar. Biraq, naqty qaı kompanıalary ekeni qupıa deıdi Asylov.
"Sonymen birge, 112 mlrd teńgege aktıvterdi memleket paıdasyna májbúrli túrde qaıtarý jóninde sharalar qabyldandy. Aktıvterdi qaıtarý jónindegi jumys nátıjeleri zańmen qorǵalatyn qupıany saqtaý talaptary eskerile otyryp, buqaralyq aqparat quraldarynda turaqty túrde jarıalanyp otyrady. Zań sheńberindegi jumyspen Sizdiń saýalyńyzda kórsetilgen tulǵa da qamtylǵan. Degenmen, Zańnyń 8-babynyń 3-tarmaǵyna sáıkes aktıvterdi qaıtarý jónindegi ýákiletti organ jáne Komısıanyń músheleri alynǵan málimetterdiń saqtalýyn jáne qupıalylyǵyn qamtamasyz etýge mindetti. Siz kórsetken aqparat aktıvterdi zańsyz ıemdenýge, shyǵarýǵa qarsy is-qımyl jasaý jáne olardy qaıtarý barysyndaǵy jumysta eskeriledi", - dep jaýap bergen Asylov mańyzdy másele kótergen Zaıytqa alǵys aıtqan.