Ulttyq ulannyń Almaty qalasyndaǵy "Ońtústik" óńirlik qolbasshylyǵynda Respýblıka kúnine arnalǵan saltanatty is-shara ótti. Oǵan belgili akter, "Shestoı post" fılminde basty róldi somdaǵan Sanýrjan Súleımenov te shaqyrylypty.
Saltanatty is-shara barysynda bul mereke – el táýelsizdigi men memlekettiliktiń qalyptasý jolyndaǵy halyqtyń birligi men yntymaǵyn pash etetin mańyzdy kún ekeni atap ótildi.
– Respýblıka kúni – elimizdiń jańa dáýirge qadam basqan tarıhı sátin aıshyqtaıtyn erekshe mereke. Áskerı qyzmetshilerdiń mindeti – osy táýelsizdiktiń, tynyshtyq pen turaqtylyqtyń kepili bolý. Biz osy boryshymyzdy abyroımen atqarýǵa árqashan daıynbyz, – dedi "Ońtústik" óńirlik qolbasshylyǵynyń qolbasshysy general-maıor Talapker Ámireev.
Mereke aıasynda qyzmettik boryshyn adal atqaryp júrgen áskerı qyzmetshiler men qolbasshylyqtyń qonaqtary marapattaldy. Sonyń ishinde akter Sanýrjan Súleımenov te QR İİM orynbasary – Ulttyq ulan Bas qolbasshysynyń buıryǵymen "Qoǵamdyq tártipti saqtaǵany úshin" tós belgisimen marapattaldy. Óner ıesi ózine kórsetilgen qurmet úshin alǵys aıtyp, "Shestoı post" fılminiń túsirilimi kezinde áskerı ómirdiń jaýapkershiligi men erliktiń mánin tereń túsingenin tilge tıek etti.
– Áskerılerdiń eńbegi – kórinbeı jasalatyn, biraq eldiń tynyshtyǵy úshin sheshýshi ról atqaratyn qyzmet. Sol eńbekti baǵalaý – ár azamattyń boryshy. El tynyshtyǵyn saqtap júrgen ár sarbazǵa alǵys sheksiz, – dedi S.Súleımenov.
Saltanatty is-shara barysynda Respýblıka kúnine arnalǵan derekti fılm kórsetildi. Onda el táýelsizdiginiń qalyptasýy, memlekettik rámizderdiń qabyldanýy jáne qazaq áskeriniń damý tarıhy baıandaldy.