Dostyq úıinde Aqmaral Arystanbekovanyń «Facets of diplomacy» (Qazaqstan dıplomatıasynyń qyrlary) atty kitabynyń tusaýkeseri ótti.
Kórnekti qazaq dıplomaty, memleket jáne qoǵam qaıratkeri, Qazaqstan Respýblıkasynyń Syrtqy ister mınıstri, BUU janyndaǵy Qazaqstannyń tuńǵysh turaqty ókili Aqmaral Haıdarqyzy Arystanbekova Qazaqstan dıplomatıasynyń tarıhyna qatysty jańa kitabyn tanystyrdy. İs-sharaǵa Almatydaǵy BUU ókilderi men ózge memleketterdiń Qazaqstandaǵy elshileri qatysty.
– Bul kitap – jáı ǵana oqıǵalar tizbegi emes. Bul – eldiń taǵdyry sheshilgen, kúrdeli de tarıhı kezeńdegi Qazaqstannyń halyqaralyq baılanystarynyń qalyptasýy týraly jazylǵan kórkem-derekti shejire. Kitapta 1980 jyldardan bastap 1991 jyldyń jeltoqsanynda Táýelsizdik jarıalanǵanǵa deıingi ýaqyt qamtylǵan, – dedi Erekshe tapsyrmalar jónindegi Elshi – QR SİM Almaty qalasy Ókildiginiń basshysy Jánibek Ábrashov.
Kitaptyń birinshi bólimi halyqtyq dıplomatıaǵa arnalǵan. Munda avtor Qazaqstannyń ózge eldermen dostyq jáne mádenı baılanystary jaıly biregeı qujat materıaldarymen, fotosýretterimen jáne estelikterimen bólisedi. Bul bólimniń qundylyǵy – materıaldardyń basym bóligi avtordyń jeke muraǵatynan alynǵan. Kitaptyń ekinshi bólimi Qazaqstannyń Syrtqy ister mınıstrliginiń táýelsizdik jarıalanǵanǵa deıingi kúrdeli kezeńdegi qyzmetine arnalǵan. Munda dıplomatıalyq qurylymdardyń qalaı qalyptasqany, qandaı qıyndyqtarmen betpe-bet kelgeni baıandalady.