Jetisý aýdanynyń ákimdigi men Óńirlik komýnıkasıalar qyzmeti birlesip uıymdastyrǵan baspasóz týrynda jýrnalıser «Gúlder» saıabaǵyndaǵy abattandyrý jumysymen tanysty, dep habarlaıdy aqshamnews.kz
Aýdan ákimi Lázzat Jylqybaevanyń aıtýynsha, saıabaqty jóndeý men abattandyrý jobasyn iske asyrý 2025 jyldyń 8 mamyrynda bastalypty. Jobanyń maqsaty – aýdan turǵyndary men qonaqtaryna arnalǵan jaıly ári ekologıalyq taza demalys aımaǵyn qurý. Osynyń aıasynda keshendi kógaldandyryp, ınfraqurylymdy jaqsartyp, aýmaqtyń estetıkalyq kelbetin arttyrmaq. Abattandyrý jumysy 13 gektardy qamtıdy.
«Qazir biz «Gúlder» saıabaǵynda turmyz, mundaǵy jumys qyrkúıekte aıaqtalady. Bul saıabaq jaqyn mańdaǵy shaǵyn aýdan turǵyndarynyń súıikti demalys ornyna aınalaryna senimdimiz. Munda lavanda alqaptary, serýendeıtin joldar, dekoratıvti arkalar jasalyp, úsh toǵandy lotos gúlimen, tiri balyqtarmen bezendirip shyǵady», – dedi Lázzat Jylqybaeva.
Sonymen qatar, saıabaq aýmaǵynda burǵylaý arqyly sý shyǵaratyn avtomatty sýarý júıesi ornatylady.
Saıabaqqa adamdardy tartý úshin fotoaýmaqtar jasalyp, parkti jaǵalaı kamera da ornatyp shyqpaq. Qazir osyndaǵy turaqty jóndep jatyr, munda qosymsha jabdyq ornatýdy josparlap otyr.
Joba aıasynda júzege asyrylatyn negizgi is-shara:
• 2100 m² birjyldyq jáne 3200 m² kópjyldyq gúlder egý;
• Uzyndyǵy 4500 metr avtomatty sýarý júıesin ornatý;
• 800 metr qorshaýdy jóndeý;
• 3 gúl arkasyn ornatý;
• 120 dekoratıvti gúl tireýin ornatý;
• 12 000 m² kógal egý;
• Lavanda alqabyn jasaý;
• 3 sándik toǵan salý;
• 1600 aǵash pen buta egý.
Aýdan ákimdiginiń habarlaýynsha, osy jumystyń arqasynda «Gúlder» saıabaǵy gúlge toly jaıqalǵan oazıske aınalyp, turǵyndardyń ómir sapasyn jaqsartyp, aýdannyń ekologıasyn ońaltýǵa sep bolmaq.
Joba qalalyq ortany abattandyrý baǵdarlamalary aıasynda iske asyrylyp, áleýmettik ınfraqurylymdy nyǵaıtýǵa, ekologıalyq jaǵdaıdy jaqsartyp, qalalyq ekojúıe qalyptastyrýǵa baǵyttalǵan.