Respýblıka kúnine oraı "Respýblıka kúni – ulttyq birlik pen jańǵyrý merekesi" taqyrybynda "dóńgelek ústel" ótti.
İs-sharanyń maqsaty – eldiń táýelsizdigi men memlekettiliktiń qalyptasýyndaǵy Respýblıka kúniniń tarıhı mańyzyn dáripteý, sondaı-aq qazaqstandyq qoǵamdaǵy birlik pen jańǵyrý qundylyqtaryn nasıhattaý.
"Respýblıka kúni – bul elimizdiń týǵan kúni. Qadirli jastar, bul árqaısysymyz úshin eń qymbat, eń qadirli kún bolýy tıis. Biz osynaý Táýelsizdiktiń, beıbit ómirdiń qadirin bilýimiz kerek. Áne, baıqasańyzdar, qýatty degen Gazanyń ózi bir kúnniń ishinde jermen-jeksen boldy. Mysaly, ol tabıǵattyń apaty bolsa, onda túsiner edik. Osynyń bári memleketter, ulttar arasyndaǵy túsinbeýshilik, alaýyzdyqtyń kesirinen. Sondyqtan, jastar, bizge beıbit ómir, mádenı sana, joǵary bilim kerek. Eger memleketimiz tynyshtyq qushaǵynda bolsa, mádenıetimiz de, ónerimiz de, ǵylymymyz da, bári álemdik deńgeıge kóterile alady. Táýelsizdik myna otyrǵan ózderińe amanat, aınalaıyndar! Bilimge, ǵylymǵa umtylyńdar, til bilińder. Sonda sender almaıtyn qamal bolmaıdy", – dedi Abaı atyndaǵy Qazaq ulttyq pedagogıkalyq ýnıversıtetiniń profesory, tarıh ǵylymynyń doktory Ǵızattýlla Halıdýllın.
"Dóńgelek ústel" basyndaǵy áńgimede tarıh ǵylymdarynyń doktory Hanzada Sýteva, aǵa oqytýshy, magıstr Medet Azanbaev, gýmanıtarlyq ǵylymdarynyń magıstri Gúljanat Ǵabdýlahmetqyzy men "Amanat" partıasy Alataý aýdandyq fılıalynyń tóraıymy Jarqyngúl Aldambergenova da oı-pikirlerin ortaǵa saldy.
Keshte ónerli jasósipirimderden quralǵan "Alash" ansambli men "Dara tumar" ortalyǵynyń oqýshylary óner kósertti. Jınalǵandar "Erke sylqym", "Kóne taraz", "Aqaral", "Áke tolǵaýy" syndy kúılerdi tyńdap, qol soǵyp, órenderge shyǵarmashylyq tabys tiledi.