Almatydaǵy №7 qalalyq klınıkalyq aýrýhananyń neıroreabılıtasıa bóliminde ınsýlt pen jaraqat alǵan 2 myńnan astam adam densaýlyǵyn qalpyna keltirdi, dep habarlaıdy aýrýhananyń baspasóz qyzmeti.
Bólimshe ońtústik astananyń ǵana emes, elimizdiń túpkir-túpkirinen kelgen naýqastardy qabyldaıdy. Sonyń biri – 58 jastaǵy Baıan Qonaqbaeva Almaty oblysynyń Qarasaı aýdanynan kelgen. Insýltten keıin oń jaǵy tolyq jansyzdanyp qalǵan ol ózdiginen tamaq iship, júrip-tura almaıtyn. Qazir osynda MÁMS sheńberinde medısınalyq ońaltýdyń úshinshi kýrsynan ótip jatyr.
«Birinshi kýrstan keıin sal bolyp qalǵan qolymdy qozǵaltyp jattyǵa bastadym. Munda sal kelgen edim, ońaltýdyń ekinshi kýrsynan soń taıaqqa súıenbeı ózim júrip kettim. Este saqtaý qabileti nashar bolatyn. Berilgen jattyǵýlardy kınezıoterapıa kabınetinen shyqqan boıda umytyp qalatyndyqtan bastan-aıaq telefonǵa túsirip alyp júrdim. Endi mine, úshinshi kezeń bitýge jaqyn qaldy, qazir úshburysh, sheńber, sharshy, juldyz syndy pishinderdi salýdy úırendim. Jazýdy qaıta úırenýge degen qulshynys paıda boldy, dárigerlerge degen alǵysymdy óz qolymmen jazyp otyrmyn», - deıdi pasıent.
Emdeýshi dáriger, neıroreabılıtasıa bólimshesi meńgerýshisi Aınur Dosybaevanyń aıtýynsha, úshinshi kýrstan keıin naýqastyń aıaǵy men qoldaǵy bulshyq etteriniń kúshi 4 balǵa deıin artqan (norma boıynsha 5,0 bal).
Jalpy, reabılıtasıa – MÁMS qarajaty esebinen júrgiziletin qymbat medısınalyq qyzmetterdiń biri. Pasıentter bólimshede kún saıyn jeke kınezıoterapıa, PNF, Bobot ádisterimen emdik dene shynyqtyrý, massaj, magnıtti terapıa, bulshyq etti elektr togymen stımýlásıalaý, logo-psıhıkalyq retteý syndy em túrlerin qabyldaıdy.
«Insýlt alǵan pasıentter bizge tolyq tekserilip, em kýrsyn bitirgennen keıin keledi. Bizdiń aýrýhanada olarmen túrli salalyq dárigerler, ádistemeshi-ınstrýktor, emdik dene shynyqtyrý mamandary, logopedter men psıhologtardan quralǵan mýltıdısıplınarlyq komanda jumys isteıdi. Bizdiń búgingi keıipkerimizben Araı Esetaı deıtin ınstrýktorymyz aınalysty», - deıdi Aınur Dosybaeva.
Insýlt alǵannan keıin bir saǵat ishinde aýrýhanaǵa jetkizilgen pasıentti emdep jazý múmkindigi joǵary. Sondyqtan tildiń kúrmelýi, aıaq-qoldyń uıýy, bettiń jansyzdanýy syndy belgiler baıqalǵan kezde birden jedel járdem shaqyrý qajet, dep atap ótti maman.
Mindetti áleýmettik medısınalyq saqtandyrý sheńberinde 2-kezeńdegi ońaltýdan ınsýlt alǵannan keıin jarty jyl ishinde ótýge bolady. Joldamany jergilikti emhana dárigerleri beredi.