1945 jyldyń 30 sáýirinde qan maıdannyń túıininiń dáleli bolyp, Reıhstagta Jeńis týy jelbirep turdy. Fashısik Germanıanyń bas ǵımaratyna birinshi bolyp Jeńis týyn tikken – qazaq ofıseri Raqymjan Qoshqarbaev bolatyn.
Raqymjan Qoshqarbaev maıdanǵa 18 jasynda attanyp, Oder men Shpree ózenderin basyp alýǵa qatysqan. Berlın úshin bolǵan sheshýshi shaıqasta onyń vzvody alǵy shepke ornalasty. Olar aldymen Koróldik alańǵa, «Gımmler úıine» jetedi. Munda leıtenant Qoshqarbaevqa tarıhı mańyzy bar – Reıhstag ǵımaratynyń ústine Qyzyl Týdy kóterý týraly buıryq beriledi. «Gımmler úıinen» Reıhstagqa deıingi qashyqtyq bar bolǵany 300 metr. Biraq bul ashyq alań bolǵandyqtan, jan-jaqtan atqylaǵan oqtardan qorǵaný kerek edi. Osy qashyqtyqty jaýynger Grıgorıı Býlatovpen 7,5 saǵatta júrip ótip, 30 sáýir kúni saǵat 18:30-da Reıhstagtyń aldyna Qyzyl Tý tigildi.
Eren erligi úshin úshin Raqymjan Qoshqarbaev Qyzyl Tý ordenimen, 1-dárejeli Otan soǵysy ordenderimen, Jaýyngerlik Qyzyl Tý jáne «Berlındi alǵany úshin» medaldarymen marapattalǵan. 1999 jyly «Halyq qaharmany» ataǵy berildi.
Soǵystan keıin Raqymjan Qoshqarbaev Almaty qalasy Halyq depýtattary Keńesiniń depýtaty bolyp saılandy. Ol soǵys ardagerleri komıteti men keńes-german dostyq qoǵamynyń Qazaq bólimshesi tóralqasynyń múshesi boldy. Soǵystaǵy estelikteri týraly «Jeńis týy», «Daýyl: 1410-shy kún» kitaptaryn jazdy.