UOS ardagerleri men qatysýshylaryna 1,5 mln teńgeden tólenedi
Bıyl Jetisý oblysynda Uly Otan soǵysyndaǵy Jeńistiń 78 jyldyǵyn merekeleý qarsańynda 2309 azamat jalpy somasy 156,7 mln teńge kólemindegi birjolǵy materıaldyq kómek alady. Onyń ishinde Memleket basshysynyń tapsyrmasyn oryndaý aıasynda oblysymyzda turatyn UOS ardagerleri men qatysýshylaryna 1,5 mln teńgeden tólenedi, dep habarlaıdy Almaty-akshamy.kz Jetisý oblysy ákiminiń baspasóz qyzmetine silteme jasap.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetinshe, búginde óńirde Uly Otan soǵysynyń 8 ardageri turady. Olardyń barlyǵy 9 mamyrǵa deıin árqaısysy 1,5 mln. teńgeden alady. Sondaı-aq jyl basynan beri ardagerlerge komýnaldyq qyzmetter úshin tólem retinde 250 myń teńge tólendi. Osy maqsatqa qarajat jyl sońyna deıin de qarastyrylǵan. Tólemder aı saıyn 3 aılyq eseptik kórsetkish mólsherinde júrgiziledi.
UOS qatysýshylary men múgedekteri qajettilikterine qaraı estý apparattary, protezdik-ortopedıalyq buıymdar sıaqty ártúrli tehnıkalyq kómekshi, gıgıenalyq quraldarmen, sondaı-aq sanatorıalyq-kýrorttyq joldamalarmen birinshi kezekte qamtamasyz etiledi.
Sondaı-aq KSRO-ny qorǵaýdyń basqa kezeńderinde maıdan shebinde áskerı qyzmettiń ózge de mindetterin atqarý kezinde jaralanǵan, kontýzıa alǵan, mertigip qalǵan, múgedek dep tanylǵan 90 áskerı qyzmetshige birjolǵy materıaldyq kómek retinde 100 myń teńgeden jalpy somasy 9,0 mln teńge tólenedi.
Sondaı-aq Ekinshi dúnıejúzilik soǵys kezinde fashıser men olardyń odaqtastary qurǵan konslagerlerde, gettolarda jáne basqa da májbúrli ustaý oryndarynda qamalǵan kezde kámelettik jasqa tolmaǵan azamattarǵa 100 myń teńgeden beriledi. Oblysymyzda bul sanatqa kiretin 1 adam turady.
Uly Otan soǵysy kezinde qaza tapqan (qaıtys bolǵan, habar-osharsyz ketken) jaýyngerlerdiń ekinshi ret nekege turmaǵan ata-anasy men jesirine (bul sanatqa jatatyn óńirimizde 19 adam bar) 60 myń teńgeden tólem jasalady. Tólemderdiń jalpy somasy 1,1 mln.teńgeden asady.
Osyndaı qarajat somasy qaıtys bolǵan Uly Otan soǵysynyń múgedekteriniń nemese memleket tarapynan qarastyrylǵan jeńildikteri boıynsha Uly Otan soǵysynyń múgedekterine teńestirilgen azamattardyń ekinshi ret nekege turmaǵan jubaılaryna da qarastyrylǵan (bul sanatqa jatatyn óńirimizde 32 adam bar). Bul sanattaǵy azamattarǵa barlyǵy 1,9 mln teńgeden astam qarajat kózdelgen.
Uly Otan soǵysy jyldarynda tyldaǵy qajyrly eńbegi men minsiz qyzmeti úshin burynǵy KSRO ordenderimen jáne medaldarymen nagradtalǵan adamdarǵa, sondaı-aq 1941 jylǵy 22 maýsymnan 1945 jylǵy 9 mamyrǵa deıingi aralyqta Uly Otan soǵysy jyldarynda keminde alty aı jumys istegen (qyzmet etken) jáne tyldaǵy qajyrly eńbegi men minsiz áskerı qyzmeti úshin burynǵy KSRO ordenderimen nagradtalǵan adamdarǵa, sondaı-aq osy kezeńde medaldarmen marapattalmaǵan adamdarǵa da 60 myń teńgeden tólenedi. Osy sanattaǵy 2159 adamǵa jalpy somasy 129,5 mln teńgeden astam qarajat qarastyrylǵan.
Sonymen qatar oblystyq jumyspen qamtýdy úılestirý jáne áleýmettik baǵdarlamalar basqarmasynyń habarlaýynsha, 2013 jyldyń sońyna deıin 6 jekelegen sanat boıynsha ardagerlerge 150 myń teńge mólsherindegi áleýmettik tólem tólenedi. Olardyń qatarynda Aýǵanstandaǵy urys qımyldaryna qatysýshylar, Semeı ıadrolyq polıgonyndaǵy synaqtardan zardap shekkender men Chernobyl AES apattyń saldaryn joıýǵa qatysýshylar da bar.