Qazaqstandaǵy barlyq soǵys ardageri men tyl eńbekkeri QTJ poıyzdarynda tegin júre alady.
Mundaı aksıany «Jeńis» bastamasy aıasynda «Samruk-Kazyna Trust» áleýmettik jobalardy damytý qory qolǵa alyp otyr, dep habarlaıdy Almaty-akshamy.kz
Aksıa Qazaqstan men TMD elderi aýmaǵyndaǵy poıyzdardyń QTJ qyzmet kórsetetin baǵyttaryn qamtıdy. Bul múmkindikti 1935 jyldyń 31 jeltoqsanyna deıin týǵan soǵys qatysýshylary men múgedekteri, tyl eńbekkerleri men eńbek maıdanynyń qatysýshylary paıdalana alady.
Aksıa 2014 jyldan bastap jyl saıyn ótkizilip keledi. Tek ótken jyly tegin saparlar 550-den astam ret paıdalanyldy.
2022 jylǵy naýqan maýsym aıynyń sońyna deıin jaramdy. Alaıda ol taǵy bir jylǵa uzartylýy yqtımal.
"Naýqan boıynsha jol júrý qujattaryn rásimdeý úshin bılet kasasyna jeke basty kýálandyratyn qujattyń túpnusqasyn jáne Ekinshi dúnıejúzilik soǵysy ardageriniń nemese tyl eńbekkeriniń kýáligin usyný qajet. TMD elderine barǵan kezde tegin jol júrý qujattary (bıletteri) tek Qazaqstan Respýblıkasynyń aýmaǵynda ornalasqan satý pýnktterinde rásimdeledi", - delingen habarlamada.
«Jeńis» jobasy kómekke muqtaj soǵys ardagerleri men tyl eńbekkerlerine áleýmettik-turmystyq qoldaý kórsetýge baǵyttalǵan. Jobanyń basty maqsaty – jeńistiń qadirin únemi este saqtap, ardaqtaý. Joba aıasynda óńirlerde júıeli negizde volonterlik reıdter uıymdastyrylady.
"2021 jyly 2100-den astam Ekinshi dúnıejúzilik soǵys ardageri men tyl eńbekkerine eriktiler 6700-ge jýyq ret bardy. Qazaqstannyń 35 qalasy men aýdanyndaǵy 650 erikti qart adamdarǵa azyq-túlik jetkizip, turmystyq kómek kórsetti, úıleriniń aýlalaryn tazalady, qorshaýlardy syrlap, shatyrlaryn bútindedi, qysqa otyn daıyndady. Erekshe muqtaj ardagerler qajetti turmystyq tehnıkamen qamtamasyz etildi", - delingen habarlamada.