Elimizde jeńil ónerkásiptiń negizgi kapıtalyna salynǵan ınvestısıalar 2023 jylǵy qańtar-qarashada 25 653,4 mln teńgeni qurady, bul 2022 jylǵy uqsas kezeńmen salystyrǵanda 4,3 ese joǵary.
Negizgi kapıtalǵa ınvestısıalardyń ulǵaıýy barlyq kishi salalarda baıqalady. Toqyma buıymdaryn óndirýde 3,6 ese, kıim 5,9 esege, bylǵary jáne oǵan qatysty ónimder 16,6 esege ósken, dep habarlaıdy almaty-akshamy.kz.
Ótken jyl sońynda Túrkistan oblysynda ınvestısıa kólemi 3 mlrd teńge bolatyn maqta óńdeý zaýyty, Batys Qazaqstan oblysynda ınvestısıa kólemi 1 mlrd 300 mln teńge bolatyn bıgbeg óndirisi jumysyn bastady. Astana qalasyndaǵy ınvestısıa kólemi 800 mln teńgeni quraǵan tigin fabrıkasy, Túrkistan oblysynda ınvestısıa kólemi 300 mln teńge bolatyn tigin fabrıkasy iske qosyldy.
Jeńil ónerkásip kásiporyndary úshin 2021-2025 jyldarǵa arnalǵan kásipkerlikti damytý jónindegi ulttyq joba sheńberinde memlekettik qoldaý sharalary kórsetiledi.
Nesıelik syıaqy mólsherlemesin sýbsıdıalaý quraly sheńberinde kásipkerge jyldyq 8% - ben kredıtter beriledi. Kredıt boıynsha kepilmen qamtamasyz etý jetkiliksiz bolǵan jaǵdaıda ishinara kepildik beriledi.
"Qarapaıym zattar ekonomıkasy" baǵdarlamasy sheńberinde negizgi qaryz alýshyǵa 8% deıingi mólsherleme boıynsha jeńildetilgen kredıt berý usynylady.
Jańa qarjy quraldarynyń biri "Ónerkásipti damytý qory" AQ arqyly jeńil ónerkásip jobalaryn 3% paıyzdyq mólsherlememen qarjylandyrý bolyp tabylady.