Qazaqstan Táýelsizdigine - 30 jyl
Shveısarıanyń Jeneva qalasynda Qazaqstan Táýelsizdiginiń 30 jyldyǵyn merekeleý aıasynda «Qazaqstan – BUU: beıbitshilik úshin seriktestik» halyqaralyq konferensıasy ótkizildi, dep habarlaıdy almaty-akshamy.kz.
Konferensıa Semeı ıadrolyq polıgonynyń jabylýynyń 30 jyldyǵy men 29 tamyz - Iadrolyq synaqtarǵa qarsy halyqaralyq kúres kúnine oraı uıymdastyryldy.
Oǵan qazaqstandyq jáne sheteldik saıasatkerler, ıadrolyq qarýsyzdaný salasyndaǵy sarapshylar, dıplomatıalyq ókildikter men mısıalardyń ókilderi qatysty.
Elbasy kitaphanasynyń dırektory Baqytjan Temirbolat óz baıandamasynda memleketimiz «ıadrolyq klýb» músheliginen abyroımen bas tartqanyn atap ótti.
«Qazaqstan ıadrolyq qarýdy taratpaý men qarýsyzdaný máselelerindegi ashyqtyq úlgisin álemge is júzinde kórsetti. Bul ashyqtyqty ol syrtqy saıasat irgetasynyń bir kirpishine aınaldyrdy. Nátıjesinde elimiz ıadrolyq qarýdy taratpaý jáne atom energıasyn beıbit maqsatta qoldaný salasyndaǵy barlyq irgeli halyqaralyq sharttarǵa qatysýshy atandy. Qazaqstan Respýblıkasynyń Prezıdenti Qasym-Jomart Toqaev Nursultan Nazarbaevtyń ıadrolyq qarýǵa qarsy bastamalaryn ilgeriletip, halyqaralyq qaýipsizdikti nyǵaıtý jónindegi saıasatty jalǵastyrýda. Memleket basshysy 2019 jyldyń qyrkúıeginde ótken BUU Bas assambleıasynyń 74-sessıasynda álemdi ıadrolyq qarýdan azat etý Qazaqstan úshin negizgi mindetterdiń biri ekenin atap ótken bolatyn»,- dedi ol.
1949 jyldan 1989 jylǵa deıin Semeı polıgonynda júrgizilgen jarylystyń sany – 456. Bul kórsetkish álem boıynsha júrgizilgen ıadrolyq synaqtardyń 25%-yn quraıdy. Radıasıanyń áserinen 1,5 mıllıonnan astam adam zardap shekti. Sharýashylyq aınalymynan 300 myń sharshy kılometrden astam jer shyǵaryldy.
Konferensıa barysynda Ulttyq ıadrolyq ortalyqtyń bas dırektory Erlan Batyrbekov, Iadrolyq qarýǵa tyıym salý jónindegi halyqaralyq kampanıanyń dırektory Beatrıs Fın, BUU-nyń qarýsyzdaný máselelerin zertteý jónindegi ınstıtýt dırektory Robın Gaıss baıandama oqydy.