Bul 7 aıdyń málimeti.
Sybaılas jemqorlyqqa qarsy agenttik bıyl 876 qylmystyq quqyq buzýshylyqty tirkegen, dep habarlaıdy Almaty-akshamy.kz
Onyń ishinde paraqorlyq, jymqyrý jáne laýazymdyq ókilettikti teris paıdalaný bar.
Ákimdikterdiń, kvazımemlekettik sektordyń jáne quqyq qorǵaý organdarynyń qyzmetkerleri jemqorlyqqa barynsha beıim. Jemqorlyq táýekelderi joǵary salalarǵa bilim berý, aýyl sharýashylyǵy, densaýlyq saqtaý jáne áleýmettik qamsyzdandyrý jatady.
Vedomstvo basshysy A. Jumaǵalı atap ótkendeı, agenttik joǵary laýazymdy tulǵalardyń qatysy bar qylmystyq sqemalardy áshkereleýge baılanysty sandyq emes, sapalyq kórsetkishterge baǵdarlanǵan.
«Anyqtalǵan qylmystardy jasaýda 592 adam áshkerelendi, onyń ishinde 107 basshy. Olardyń ishinde burynǵy mınıstrler, vıse-mınıstrler, komıtet tóraǵalary, oblystyq basshylar bar. Sybaılas jemqorlyqqa qarsy qyzmet ádilet eks-mınıstrine jáne basqa da adamdarǵa qatysty sotqa deıingi tergep-tekserýdi aıaqtady», - delingen agenttik taratqan aqparatta.
Ol jeke kompanıanyń basshylyǵymen birge búdjet qarajatyn asa iri mólsherde jymqyrdy, alaıaqtyq jasady jáne kásipkerlik qyzmetke zańsyz qatysty degen kúdikke ilingen.
Sondaı-aq, Agenttik burynǵy mádenıet jáne sport vıse-mınıstri men merdiger uıymnyń basshylyǵyna qatysty laýazymdyq ókilettikterin asyra paıdalandy jáne búdjet qarajatyn jymqyrdy degen kúdik boıynsha qylmystyq isti tergeýdi aıaqtady.
Atalǵan isterdiń árqaısysy boıynsha zalal 1 mlrd teńgeden asady.