Sybaılas jemqorlyqqa qarsy is-qımyl agenttiginiń 1424 Call-ortalyǵyna 2023 jyly 27 752 qońyraý túsken. Onyń 6 708-i ǵana Sybaılas jemqorlyqqa qarsy qyzmettiń quzyretine jatady. Agenttik osylaı resmı jaýap berdi.
Al 2024 jyldyń alǵashqy eki aıynda 5 274 habarlama tússe, sonyń 1 039-y ǵana Antıkordyń quzyryna jatatyn bolyp shyqqan. Barlyq ótinish boıynsha túsindirmeler berilip, máseleniń mánine baılanysty tıisti sharalar qabyldanǵan.
Azamattardyń ótinishteriniń sıpaty kóbine quqyq qorǵaý organdarynyń is-áreketterin qadaǵalaýǵa, sonymen qatar, ishki ister, bilim berý, densaýlyq saqtaý salalary qyzmetkerlerine, sondaı-aq turǵyn úı-kommýnaldyq sharýashylyǵy men áleýmettik qamsyzdandyrý máselelerine qatysty, – delingen resmı jaýapta.
Agenttiktiń habarlaýynsha, 1424 Call-ortalyǵyna túsetin halyqtyń barlyq máselesin qyzmetkerler jumys kúniniń sońynda óńdeıdi.
Aıta ketý kerek, sybaılas jemqorlyq faktisi týraly habarlaǵan nemese jemqorlyqqa qarsy is-qımylǵa ózge de jolmen járdemdesetin (kórsetken) adamdardy kótermeleý jaǵy agenttik tóraǵasynyń 2023 jylǵy 29 tamyzdaǵy №270 buıryǵymen bekitilgen qaǵıdalarda kózdelgen. Máselen, 2023 jyly 73 adamǵa 22 416,3 myń teńge syıaqy tólense, bıyl áýelgi 2 aıda 18 adam 2 786,3 myń teńgemen marapattalǵan.
Sonymen qatar, el azamattary jemqorlyq quqyqbuzýshylyq týraly habarlamalaryn E-Otinish biryńǵaı óńdeý platformasy, antikorkz_bot Telegram-arnasy arqyly nemese aýmaqtyq departamentterge jazbasha habarlaı alady.